CIRDÒC – Institut occitan de cultura

Las mediacions culturalas e educativas

Ensenhants, animators escolars e periescolars, associacions, collectivitats : la Mediatèca occitana met a vòstra disposicion ressorsas e material per la mesa en òbra de vòstres projèctes educatius o d'animacion culturala en direccion del public jove, per tal de los sensibilizar a la lenga e a la cultura occitanas.
Servicis
Mediacions culturalas e educativas

Descobrir l'ensemble de las ressorsas e supòrts dedicats

Ma bibliotèca de pòcha : en foncion del tèma, de l'atge, del dialècte, 100 % adaptable a vòstres besonhs, una seleccion d'obratges e supòrts per manlevar fins a 6 meses.

Maletas de lectura : A cadun son libre !

La Mediatèca del CIRDÒC - Institut occitan de cultura prepausa als ensenhants de malas de lectura, per tal de permetre a cada escolan/estudiant de dispausar d'un exemplar de l'obratge estudiat. Malas de 30 exemplars identics al prèst, acompanhadas d'enregistraments sonòrs e de pistas pedagogicas. 12 títols disponibles.
Kamishibaï en occitan : de nombroses títols disponibles en occitan dins sas diferentas variantas. Un castelet/butai pòt èsser mes a disposicion per tres setmanas, a l'acuèlh de la Mediatèca.
A l'entorn del conte : Los Amics de Joan de l’ors. Una exposicion (en occitan lengadocian o occitan gascon) per pichons e grands a l'entorn dels personatges emblematics de la literatura orala occitana. Una maleta tematica a l'entorn del conte pòt la venir completar.
Mon primièr erbièr de fuèlhas : en associacion amb l'agéncia creativa OKIDOKID, un magnific erbièr de fuèlhas tot en occitan. Disponible gratuitament per las classas, animators e mediators del patrimòni, en acompanhament de l'exposicion Lenga Viva, lenga del viu.
Primièrs passes dins la cultura occitana : trocèl d’animacion la CLAU (Cultura e Lenga Animadas Uèi) : De qu'es, l'occitan ? Ont se parla ? Coma se legís ? Coma se pronóncia… e ont ? Lo dispositiu de mediacion la CLAU fornís als animators e programators evenimencials totas las claus per far descobrir la lenga e la cultura occitanas.
Enquèsta interactiva Qui a matat Francés Canat ? Entre BD grandor natura, videojòc e « murder party », Qui a matat Francés Canat ? es una enquèsta interactiva imaginada per l'Atelier In8. Dins aquela version integralament en occitan coproducha pel CIRDÒC - Institut occitan de cultura, cabussatz dins l'univèrs del polar mercés a la realitat aumentada.

Retrobatz tanben en linha sus la Maleta de ressorsas per anar mai luènh :

Autopsia del polar, un libret de 40 paginas per descobrir lo genre del roman policièr jos totas sas formas e sas incarnacions occitanas (concepcion : Atelier In8 ; adaptacion : Yan Lespoux, Cecilia Chapduèlh, CIRDÒC).

L'integralitat dels dialògs (tèxtes e sons) a telecargar (adaptacion e voses occitanas : Danis Chapduèlh, Caroline Dufau, Yves Durand).
Tè ! L'estudiò mòbil : per enregistrar sas emissions sonòras.
Aquel estúdio mobil, concebut pel CIRDÒC - Institut occitan de cultura, met a la disposicion dels ensenhants tot lo material necessari a l'enregistrament d'emissions ràdio o de podcasts en occitan, per de projèctes d'educacion als mèdias (setmana de la premsa e dels mèdias...) o per l'enregistrament de contenguts audio (lectura a-z-auta votz, ficcions sonòras...)
Siestes sonores : Viatjatz dins la creacion musicala occitana, pel temps e los estils. Una bòrna d'escota, de cascos, de transats mofles, e de cartas que vos descrivon pel menut çò que degustan vòstras aurelhas.

Iniciacion a la practica esportiva - Jòc de tambornet

La Médiatèca occitana met a la disposicion dels establiments escolars e collectivitats un jòc de 18 tamborins e de balas. Per anar mai luènh, esitatz pas a manlevar en parallèl l'exposicion suls espòrts tradicionals : Mai lèu, mai naut, mai fòrt.
Exposicion Ua lenga, l’occitan : L'ambicion d'aquela exposicion es de promòure la coneissença de l'istòria de la lenga occitana, de las originas a nòstres jorns, dins l'ensemble lingüistic occitan e quitament endacòm mai. Una exposicion en 22 panèls bilingües (òc gascon).
Maleta d'animacion « Paraulas de païses/Paraulas de país : escapada occitana » de l'IEO Auvèrnhe, Borbonés, Velai : Concebuda e editada per la seccion Auvèrnhe-Borbonés-Velai de l'Institut d'Estudis Occitans, aquela maleta permet una iniciacion ludica a la lenga e a la cultura occitanas : s'i retròban jòcs (memory, sèt familhas), carta, kamishibaï, fichas d'activitat… aital coma un libret pedagogic mas tanben de fichièrs sonòrs a retrobar sus la Maleta d’Occitanica.

Modalitats de prèst

La signatura d'una convencion e la creacion d'una carta d'abonament « collectivitat, persona publica, entrepresa o associacion aderenta » vos permeton de manlevar aqueles diferents supòrts. Lo transpòrt e l'assegurança demòran a la carga del manlevaire, a la partença de la Mediatèca occitana (CIRDÒC - Besièrs), o del site de Pau.

Prèstes de longa durada de documentacion occitana

Las cartas collectivitat, persona publica, entrepresa o associacion aderenta » vos permeton tanben de manlevar un ensemble documentari consequent (fins a 50 documents) per tal de prepausar a vòstres publics de ressorsas documentàrias, de descobèrta o d'aprigondiment, a l'entorn del domeni occitan ; e de beneficiar dels servicis e espleches professionals.
Esitatz pas a consultar la guida Mediatèca, premiers pas pour un fonds occitan e los numèros de Tè ! catalòg de la creacion occitana actuala.
Ne saber +
Consultar nòstras colleccions catalog.oc-cultura.eu/
Descobrir los  numèros de Tè !
Consultar Mediatèca, premiers pas pour un fonds occitan

Acompanhament de projèctes

Per tal d'acompanhar las collectivitats, lo CIRDÒC – Institut occitan de cultura propausa divèrsas accions e servicis, respondent als grands aisses de sa politica de cooperacion en matèria de :
Conservacion e valorizacion dels patrimònis occitans d'un territòri.

Mesa en plaça e animacion d'una ofèrta documentària en occitan.

Desvolopament cultural e territorial.

Desvolopament de las practicas culturalas occitanas en miègs escolars, periescolars, extraescolars, o la mesa en òbra de percors d'educacion artistica e culturala.
Per ne saber mai sus aqueles divèrses projèctes, vos convidam a consultar la rubrica «  Acompanhament de projèctes » de nòstre site.

L'acompanhament de projècte propausat pel CIRDÒC – Institut occitan de cultura dins lo quadre de sa politica de cooperacion es gratuit per las collectivitats, jos resèrva d'elaborar un projècte partenarial respondent al PSCE de l'establiment, e desbocant sus una convencion d'associacion. L'ensemble dels supòrts, exposicions itinerantas e espleits de mediacion propausats per l'establiment en complement de son expertesa, (veire çai sus) son per lor part disponibles a cada moment pels aderents a l'ofèrta collectivitats.

Adesion : condicions e tarifas

Per beneficiar d'aqueles servicis, vos convidam a venir aderent del CIRDÒC - Institut occitan de cultura.
En venent aderent "prò" coma collectivitat, persona publica, entrepresa o associacion, otra l'accès a l'ensemble dels servicis presentats, sostendretz e participaretz al desvolopament de nòstras activitats en direccion dels territòris, dels publics e de las filièras professionalas.

Tarifas :

Personas publicas membras del Conselh d'administracion de l'EPCC e lors servicis : exemptadas de cotizacion.

Associacions, comunas e establiments publics de - de 5.000 abitants, entrepresas de - de 10 salariats, establiments escolars : 45 € / an.

Comunas, collectivitats, establiments publics de 5.000 a 15.000 abitants, entrepresas de + de 10 salariats, universitats : 150 € / an.

Comunas, collectivitats e establiments publics de 15.000 a 40.000 abitants : 250 € / an.

Comunas, collectivitats e establiments publics de mai de 40.000 abitants : 500 € / an
chevron-upchevron-down