Primièra seria de ficcion producha per França 3 Occitània, La Seria faguèt l'eveniment dins lo paisatge audiovisual a sa sortida sus la plataforma de FranceTV. Imaginada per Amic Bedel e Julien Compredon, coproducha per AnderAndera e Piget films, aquela òbra audiovisuala en 5 episòdis que jòga amb los genres e la mesa en abisme.
Lo CIRDÒC - Institut occitan de cultura e l'agéncia Occitanie Films collabòran amb la còla de produccion per prepausar d'espleches e accions d'acompanhament al public e als ensenhaires a l'entorn d'aquela creacion excepcionala.
Frucha d'aquela collaboracion : una plaqueta pel public grand (disponibla alprèp d'Occitanie Films) e un dorsièr documentari bilingüe concebuts per la documentarista Hélène Morsly. Pensat pels ensenhaires e l'utilizacion en classa, lo dossièr documentari es prepausat per telecargar (en version occitana o en version francesa) sus la FaBrica aicí o coma libret de papièr per las classas alprèp del CIRDÒC - Institut occitan de cultura.
En perlongament, lo CIRDÒC - Institut occitan de cultura a menat en associacion amb Occitània Films una accion EAC pilòta a l'entorn de la Seria amb los escolans del collègi del Naut-Gavaudan e del licèu Théophile Roussel de Sanch Eli d'Apchièr. Après una projeccion de mantun episòdi al Ciné-Teatre seguit d'un escambi amb l'equipa de la Seria, los liceans que seguisson los ensenhaments d'occitan e de cinèma-audiovisual an poscut participar a una aprèp-miègjorn de talhièrs practics amb Amic Bedel (scenarista e realizator) e Estela Blenet (primièra assistenta camera e comediana). Poguèron trabalhar a lor pròpria escritura de scenari alternatiu. Lo trabalh se perseguís en classa a l'entorn dels 3 episòdis seguents per caduna de las doas opcions jos la direccion de lors ensenhairas. Aquela experiéncia serà modelizada per tal de permetre a maites establiments de s'i apiejar.
