En 2020, lo Pargue nacional de las Cevenas fisèt a l'etnològa Monique Carlier l'òbra de recèrca e compilacion de las donadas conegudas pertocant l'usatge e la denominacion occitana de las plantas. Aquel còrpus d'informacion ven d'ara enlà completar lo catalòg de la flòra del Pargue. Regropa una o mantuna traduccion per gaireben 250 referéncias taxonomicas, mas tanben la localizacion de las denominacions, l'usatge de la planta, aital coma la font bibliografica.
La Direccion dels servicis de l'Educacion nacionala de Losera e lo CIRDÒC - Institut occitan de cultura collabòran a comptar de l'annada escolara 2024-2025 amb lo servici educatiu del Pargue per la valorizacion d'aquela basa de donadas per una mediacion educativa bilingua (francés/occitan) dins de classas de CE-CM de Barras-de las-Cevenas e del Pont-de Montvert e dels collègis del Bleymard e Meyrueis. Los supòrts pedagogics de mediacion atal creats dins l'encastre del projècte Flòra de Cevènas seràn partejats dins los establiments escolars, suls espleches del Pargue e sus la Maleta d'Occitanica. Lor mesa en forma grafica es presa en carga pel CIRDÒC - Institut occitan de cultura, que n'a fisat la maqueta al Studio de la Bèstia.
Lo projècte Flòra de Cevenas s'intègra dins lo programa Lenga viva, lenga del viu, lo programa d'accions EAC del CIRDÒC - Institut occitan de cultura a l'entorn de la botanica e de la transmission dels sabers.
