Lo CIRDOC - Institut occitan de cultura que’s junta au País de Bearn hens l’encastre d’un programa de valorizacion deu patrimòni culinari deu territòri dab la tòca de’n har un inventari e de transméter las practicas culinàrias de Bearn (Novèla Aquitània). Écocène, organisme especializat dens la mediacion culturau e la sensibilizacion aus enjòcs environamentaus, que conceberà la maleta pedagogica .
Segon la definicion de l'Unesco, lo patrimòni alimentari e culinari qu'ei partida integranta deu patrimòni culturau immateriau dens lo sens on: lo “minjar ei ua compausanta essenciala de l'identitat culturau deus pòbles e de las comunautats, tant au nivèu locau que mondiau”. Aqueth patrimòni culturau immateriau que's defeneish per “las practicas, representacions, expressions, coneishenças e saber-har” ligats a ua identitat culturau e transmetudas dens ua comunautat.
Bearn que dispausa d'un patrimòni culinari ancian e diversificat en rapòrt dab lo son environament e la soa istòria : un patrimòni ordinari, deu quotidian, com un patrimòni extrà-ordinari ligat a las hèstas e rituaus. Las coneishenças, recèptas e gèstes en ligam dab aqueth patrimòni culinari que son transmetuts dens la familha o dens lo demiei professionau de la restauracion.
Lo CIRDOC - Institut occitan de cultura que s'estaca atau a l'identificacion de las practicas culinàrias deu territòri entà preservar e transméter aquera compausanta deu patrimòni culturau immateriau de l'espaci occitan. Aqueth programa de cooperacion que respon ad aqueth objectiu de transmission gràcias a la creacion d'ua maleta pedagogica suu tèma deu patrimòni culinari bearnés qui serà difusada en lo demiei escolar autanlèu lo prumèr trimèstre 2025, a la mesa en linha d'un repertòri de practicas e recèptas suu site internet Mondes d'Occitanica consacrat a las riquessas deu patrimòni culturau immateriau occitan e a diferentas mediacions tot au long deu projècte.
