Installada dempuèi 1998 sus la plaça del 14 de Julhet a Besièrs, la Mediatèca del CIRDÒC - Institut occitan de cultura aculhís la majoritat de las colleccions patrimonialas istoricas de l'establiment. Son rengadas dins de resèrvas adaptadas a la conservacion dels nombroses documents precioses e ancians collectats dempuèi 1975.
Los fonzes de l'establiment cessant pas de s'acréisser, la question de la reconfiguration dels espacis de conservacion s'impausèt aquestas annadas. Conscient de la necessitat de garantir la bona conservacion d'aquela colleccion labellisada Col·lEx (Colleccions d'Excelléncia), lo pòl Patrimòni e sabers entamenèt en 2024 un vast obrador de reamainatjament de sas resèrvas patrimonialas.
La primièra etapa d'aquela operacion foguèt consacrada a l'organizacion de l'iconotèca (colleccions d'imatges : afichas, cartas postalas, fotografias, arts visualas e fonzes audiovisuals), e mai particularament al recondicionament e a l'optimizacion de la recaptason del fons d'afichas (mai o mens 7000 pèças). Gràcias al sosten del ministèri de la Cultura dins l'encastre de l'apèl a projècte Patrimòni escrich de las bibliotècas de 2023, l'establiment poguèt aquesir tres mòbles pels plans novèls per tal d'aculhir aquelas afichas.
Aquelas aquisicions novèlas an tanben condusit a una redistribucion de la fonotèca (colleccions musica) sus de novèlas laissas. D'equipas de transportaires foguèron mobilizadas per efectuar aquelas manipulacions e reamainatjaments.
Al trimèstre darrièr de 2024, l'establiment aculhís un vacatari que la mission n'es de procedir al recondicionament e al tractament del fons d'afichas, que serà rengat dins los mòbles novèls. L'objectiu es tanben de començar lo senhalament del fons sus l'esplech Calames. Aquò permetrà d'alargar lo ventalh dels fonzes descriches sus aquel catalòg, qu'uèi se limitan als fonzes d'archius e a las colleccions de manuscrits del CIRDÒC - Institut occitan de cultura.
Aqueles amainatjaments novèls constituïsson un projècte sul long tèrme, profechós sul plan de la conservacion, mas egalament de la coneissença dels fonzes per l'equipa del pòl Patrimòni e sabers.
