Lo CIRDOC, associat deu projècte Interreg Sudoe RESPIRA

Lo CIRDOC - Institut occitan de cultura que participa au projècte  Interreg Sudoe RESPIRA (2025-2028). Finançat peu programa europèu Interreg Sudoe, qu’amassa 9 associats francés, espanhòus e portugués e beneficia d’un cofinançament deu Hons europèu de desvolopament regionau (FEDER) per un còst totau de 1.733.800,00 euros, dont 1.300.350,00 euros d’ajuda deu FEDER (75%).

Aqueth projècte qu’estudia los patrimònis memoriaus, naturaus e culturaus deus quaus las lengas e son un vector. Lo crotzament d’aqueths elements que forma lo capitau territoriau de tota region. L’enjòc qu’ei atau la revitalizacion de las zònas ruraus deu sud-oèst europèu (França, Espanha, Potugau) en ahorti’s suu lor patrimòni territoriau unic.

Cap aus desfis deu despòblament e de l’envielhida de la populacion, RESPIRA que perpausa de s’apear suus patrimònis locaus (que sian culturaus, naturaus o memoriaus) com autant de lhevaders de desvolopament duradís, d’innovacion sociau e de coesion territoriau.

Los objectius deu projècte Interreg Sudoe RESPIRA

 Lo projècte que s’empara sus 3 objectius :

• valorizar lo capitau territoriau, en çò qui hè la soa singularitat (saber-har artisanaus, paisatges, itineraris istorics, gastronomia…)
• revitalizar l’economia locau, per un torisme duradís e profesionau capable de parcar las populacions suu lòc
• ahortir la transmission, dab utís entà transméter lo patrimòni a las navèras generacions e taus visitaires, en los diferents territòris.

Los 9 associats qu’an començat un tribalh transdisciplinari sus 5 axes:

1. ua estrategia de valorizacion, que permeterà definir un apròchi comun entà identificar l’identitat patrimoniau
2. un plan d’accion transnacionau, entà desplegar solucions concràtas a l’escala locau
3. esquèmas patrimoniaus que constitueishen modèles tà har vàler per las autoritats publicas
4. formacion e sensibilizacion, entà educar los actors locaux e lo public a la valorizacion de la loa identitat territoriau
5. establir accions pilòts entà experimentar aqueths utís suu terrenh e evaluar la loa qualitat

Lo ròtle deu CIRDOC - Institut occitan de cultura

Lo CIRDOC – Institut occitan de cultura que hè partida deus 9 associats coordinats peu Pays de Béarn (França) a saber :

-la municipalitat de Barcelos e l’AECT Rio Minha peu Portugau,

- la Diputación Provincial de Teruel, l’Universidad Pública de Navarra, la Fundació Institut Català de Recerca en Patrimoni Cultural e l'Asociación Ibérica de Municipios Ribereños del Duero en Espanha,

- lo Pôle Métropolitain du Pays de Béarn (capdau de fila), la Communauté de Communes Pyrénées Haut Garonnaises et le CIRDOC – Institut Occitan de Cultura en França.

La nosta estructura qu’intervien en lo projècte com associat culturau e coordinator d’accions transversaus com la creacion d’ua estrategia de valorizacion deus patrimònis, la coordinacion de grops de tribalh e de sostien a l’elaboracion de projèctes culturaus.

Las purmèras estapas deu projècte RESPIRA 2025-2028

Iniciat en junh 2025, lo projècte qu’a dejà passat mantuas estapas operacionaus:

-abòr e ivèrn 2025 : presentacion deus projèctes en cada territòri

-octobre 2025 : l’amassada de lançament deu projècte que’s debanè a Salias-de-Bearn (França) e qu’acampè lo consòrci peu purmèr còp

-març 2026 : la vila de Barcelos (Portugau) qu’arcueilhó la dusau amassada deu comitat de coordinacion. A parlar : apregondir la reflexion sus la valorizacion de l’identitat patrimoniau com utís de desvolopament duradís e d’ahortiment de la resiliéncia deus territòris periferics e/o economicament fragilizats. Peu parçan de Barcelos, lo projècte que s’interessa notadament a la vath de Neiva, on seràn miadas accions de diagnostic, de valorizacion e d’articulacion de las ressorças culturaus e patrimoniaus, dab los actors locaus en un apròchi participatiu.

Las amassadas a viéner deu consòrci que son previstas en junh 2026 a Pampalona e en octobre a Girona. Que’vs tieneram assabentats de l’avançada d’aqueth projècte.

Tà tota question : etnopole@oc-cultura.eu