Residéncias de cèrca e creacion del CIRDOC - Institut occitan de cultura

Residéncias artisticas / Résidences artistiques

Acuèlh en residéncias de cèrca e de creacion

Contèxte e objectius

La creacion artistica representa un vector important que contribuís directament als programas d'accion del CIRDÒC - Institut occitan de cultura en matèria de valorizacion e de desvolopament cultural, en particulièr dins lo cas de projèctes :

  • qu'òbran al renovèlament de las coneissenças e dels agaches portats sus las òbras e documents que constituísson las colleccions del Centre ;
  • que participan a la valorizacion de las colleccions e mai largament del patrimòni cultural occitan vèrs de publics novèls en França e a l'internacional ;
  • que constituísson d'accions de transmission de las expressions, practicas e saber-far que relèvan del patrimòni cultural immaterial occitan ;
  • que participan al renovèlament e a l'enriquiment de las expressions culturalas e intellectualas occitanas, de las capacitats de la lenga occitana e de sos usatgièrs (artistas, practicians, participants e publics) a exprimir una concepcion a l'encòp originala e universala del monde contemporanèu.

 

Modalitats d'acuèlh

Lo CIRDOC – Institut occitan de cultura : un luòc e una equipa per acompanhar la vòstra creacion

L’acuèlh d'una residéncia artistica al CIRDÒC - Institut occitan de cultura es concebuda coma un acte de cooperacion entre l'establiment, sas equipas e los artistas e intervenents aculhits. Son organizacion deu visar a l'escambi e al partatge d'informacions, de competéncias e de coneissenças.

Lo CIRDÒC - Institut occitan de cultura interven coma un espleit a la disposicion de creators que los projèctes benefícian d'un autre costat de sostens e de difusors professionals, e met a lor disposicion sos camps de competéncia en pròpri :

  • ajuda a l'identificacion e organizacion de trabalh conjunt amb de competéncias complementàrias (linguisticas, culturalas, scientificas, tecnologicas, economicas) ;
  • consèlh en documentacion, ajuda al reperatge e a l'espleitacion de documentacion e de ressorsas patrimonialas dobrant a la realizacion de la creacion ;
  • mesa a disposicion d'espacis e de materials ;
  • concepcion en coproduccion de contenguts e de supòrts de valorizacion culturala en ligam amb la creacion ;
  • organizacion de rencontres amb lo public e los programators potencials dins lo quadre d'una programacion « en òba » (restitucion de sortida d'un trabalh de cèrca e creacion) ;
  • promocion e difusion de la creacion dins lo quadre de sa programacion artistica e de la programacion dels luòcs e eveniments partenaris ;
  • promocion de la creacion dins lo quadre de sos otisses d'informacion (portal « La FaBrica » dedicat a l'actualitat de creacion occitana occitanica.eu/fabrica e Tè ! Catalòg de la produccion culturala occitana) ;
  • presa en carga de fraisses dirèctament ligats a las activitats de cooperacion amb lo CIRDOC - Institut occitan de cultura (desplaçament, albergament, restauracion) ; dins los limits d'una envelopa restreita e definida al prealable segon las modalitats detalhadas dins lo capitól : « Barèmas de presa en carga » de la carta d'acuèlh en residéncia.

Cada residéncia dura en mejana 5 jorns (del diluns al divendres) dins l'un o l'autre dels dos sites de l'establiment (Pau o Besièrs). Excepcionalament, de  residéncias crosadas o fòra-las-parets pòdon obrir la via a de duradas mai longas o a de sits d'acuèlh exteriors (per mai de detalhs, consultar la Carta complèta).

 

Condicions d'accès als acuèlhs en residéncia

An accès a l'acuèlh en residéncia :

  • tot artista o grope d'artistas, occitanofòns o pas, dins la mesura ont lo projècte artistic propausat pòrta sus l'occitan lenga e/o cultura ; 
  • tot projècte de residéncia de recèrca o d'escritura. Seràn pas pres en compte los projèctes artistics de mesa en espaci o en lum, que los espacis limitats del CIRDÒC - Institut occitan de cultura sauprián pas respondre als besonhs ;
  • de projèctes que representan una vision innovanta e actuala de la lenga e de la cultura occitanas que propausa notadament lo rencontre amb d'autras culturas, l'adaptacion e la transmission del patrimòni cultural occitana e/o l'usatge de mòdes d'expression inedits.

Los apèls a residéncia apèls ofrisson doas modalitats de participacion :
- Projèctes de creacion liures : lo.s artista.s seràn amenats a propausar la creacion de lor causida, sens tematica impausada ;
- Projèctes de creacion tematicas : en relacion amb l'actualitat de la cultura occitana e/o amb lo de l'establiment - qu'organiza cada an divèrs eveniments amb lo mitan universitari, scientific e cultural -, lo CIRODC - Institut occitan de cultura se resèrva lo dreit de propausar ponctualament de cridas a projèctes de residéncia ciblats sus una tematica de sa causida.
appels à projets de résidence ciblés sur une thématique de son choix.

Datas e modalitats de candidatura
Per fin d'assegurar a totes un accès egal a son dispositiu de residéncia artistica, e de melhorar l'eficiéncia d'aqueste, lo CIRDÒC - Institut occitan de cultura a decidit de metre en plaça doas sessions d'apèls a projèctes de residéncia per annada :
- un primièr en febrièr-març de l'annada N que pòrta sus las residéncias artisticas que se debanaràn dins lo corrent de la davalada de la meteissa annada ;
- un segond en octòbre-novembre de l’annada N, que pòrta sus las residéncias artisticas que se debanaràn dins lo corrent del primièr semestre de l'annada N+1.

Las cridas a residéncia son publicadas an aquel periòde dins la rubrica Lo Mag de la FaBrica.
Artistas, compnhias, escrivans... desiratz èsser tenguts informats dels apèls venent ? Inscrivètz-vos a la nòstra lista d'informacion dedicada en prenant contacte al près de s.juan@oc-cultura.eu

Per descobrir l'integralitat  de las modalitats e critèris d'accès : Charte d'accueil des Résidences de création artistique (1)


chevron-upchevron-down