Au parat de las Jornadas europèas deu patrimòni 2026, l'Etnopòle CIRDÒC-Institut occitan de cultura e lo CERC-centre de creacion musicau qu'an presentat lo projècte RECCONNECT-INSPIR dedicat au tamborin a còrdas. Aqueth encontre que marca ua estapa navèra entau projècte europèu RECCONNECT-INSPIR, qui ambiciona de har deu patrimòni musicau pirenenc un vector de transmission, de creacion e de cooperacion enter França e Aragon.
Lo 18 d'octobre darrèr, la sala de recepcion deu bastiment Cerquem ! Ciutat (Pau) qu'arcuelhó l'encontre public entitolat « lo tamborin a còrdas : revitar, resistir, réimaginer ».
Emblematic de Bearn e mei largament de las culturas musicaus pirenencas e gasconas, lo tamborin a còrdas qu'ei estat au centre d'un temps d'escambis qui a interrogat lo son aviéner au sègle XXI.
Quin preservar un instrument tradicionau shens ac calhar ?
Quin transméter los saber-har qui'u son associats ?
E sustot, quin perméter ad aqueth instrument d’ arretrobar ua plaça dens las practicas musicaus contemporanèas ?
La serada que s'ei obèrta per ua intervencion de Jean-Jacques Castéret (director de l'Etnopòle au CIRDÒC-Institut occitan de cultura) e de Romain Baudoin (musician e conselhèr artistic au CERC-Centre de creacion musicau), contextualizant l'instrument dens lo projècte europèu RECCONNECT-INSPIR (Interreg-Poctefa).
Arron, los participants que son estats convidats a escambiar suus enjòcs de sauvaguarda, de fabricacion e de reapropriacion contemporanèa de l'instrument, pausant atau las hicas d'ua dinamica navèra de practica locau.
Aqueth esclairatge portat au parat de las Jornadas europèas deu Patrimòni que s'inscriu dens ua desmarcha mei larga engatjada dab RECCONNECT-INSPIR, qui a per objectiu de valorizar e transméter lo patrimòni musicau pirenenc dens ua perspectiva resoludament transfrontalèra. Lo tamborin a còrdas qu'i aucupa ua plaça particulara.
Lo projècte qu'amassa quate partenaris francés e espanhòus : lo CIRDÒC-Institut occitan de cultura, gavidaire, lo CERC- centra de creacion musicau, l'Universidad de Zaragoza e l'Escuela de Violería de Zaragoza, en Aragon.
La soa ambicion qu'ei d'apressar univèrs qui tribalhan sovent separadament : luteria, recèrca, creacion artistica e transmission. L'enjòc que consisteish sustot a documentar instruments istorics, a arretrobar los gèstes e los saber-har necessaris a la lor fabricacion e a experimentar navèras faiçons de'us har enténer.
Lo projècte qu'a atau dejà permetut aquestes mes, un important tribalh de reconstitucion de tamborins a còrdas, a partir sustot de honts iconograficas europèas, permetent de compréner mélher la soa istòria e las soas caracteristicas, en obrir carrèra a navèths usatges.
L'aute enjòc màger de RECCONNECT-INSPIR qu'ei de har passar lo patrimòni de la conservacion a la practica : ua exposicion plurilingua que permeterà de presentar l'istòria deu tamborin a còrdas, los sons usatges e los saber-har qui'u son ligats, sustot au près deus joens.
Ua banca de sons liurament accessible que vienerà egaument documentar los instruments e favorizar la lor apropriacion peus musicians. Fin finau, ua residéncia artistica que permeterà aus artistas d'experimentar navèras creacions a partir deus instruments reconstituïts e de las lors versions numericas.
Ua articulacion enter patrimòni e creacion : ne s'ageish pas solament d’arretrobar çò qui existiva, mes de balhar aus instruments arreconstrusits los mejans de contunhar a evoluar e a estar jogats.
>> Descobritz l'entervista realizada per Ràdio País au parat d'aquera serada de presentacion, sus aqueth ligam
Lo projècte RECCONNECT-INSPIR qu'ei cofinançat a 65 % per l'Union Europèa dens l'encastre deu programa INTERREG VI-A Espanha-França-Andòrra (Poctefa 21-27) e que benefícia d'un budget deu Fons europèu de desvolopament regionau (FEDER) de 94 890,94 € per un còst totau de 145 986,06 €.
>>
Entà ne saber mei suu sostien d'Euròpa a la cooperacion transfrontalèra, que podetz consultar :
