Avètz una question ?
Gràcias a l’ample de sas colleccions e ressorsas documentàrias que cobrisson l’ensemble dels camps de la coneissença ligats a la lenga e la cultura occitanas, mas tanben per la diversitat de sos mestièrs e de sos malhums de cooperacion, lo CIRDÒC – Institut occitan de cultura assegura un servici d’informacion de referéncia gratuit e accessible a totas e a totes
Servici de documentacion e de reproduccion a distància
Las colleccions del CIRDÒC – Institut occitan de cultura son geridas e rendudas accessiblas dins l’encastre de sas missions d’informacion, de difusion de las òbras e dels sabers, de contribucion a las accions de valorizacion dels creators, editors, difusaires, associacions o collectivitats.
Lo CIRDÒC – Institut occitan de cultura s’engatja a facilitar l’accès e la reütilizacion de las òbras, ressorsas e documents que n’a la responsabilitat en tot garantir lo respècte de la legislacion en aplicacion, notadament lo drech dels creators e tanben lo respècte de las nòrmas de conservacion per las colleccions d’interès patrimonial.
Prèst de salas e equipaments
Dins sos dos sites, la Mediatèca (Besièrs) e l’Etnopòle (Vilhèra), lo CIRDÒC – Institut occitan de cultura met a disposicion de las associacions, collectivitats, artistas mas tanben dels particulars, d’espacis de trabalh, d’acamp, e d’equipaments.
Prèst d’exposicions itinerantas
Lo CIRDÒC – Institut occitan de cultura met a la disposicion de las collectivitats un ample ventalh de ressorsas e de supòrts concebuts per las ajudar a valorizar e difusar la cultura occitana alprèp de lors publics.
Ajuda a la creacion, al desvolopament e a la valorizacion de fonses documentaris occitans
La salvagarda dels fonses documentaris constituits o gerits per d’associacions, lo tractament e l’entreten de fonses d’usatge per la recèrca, l’ensenhament e la cultura, la creacion de fonses generalistas o tematics per de mediatècas e establiments culturals constituisson d’accions importantas a l’encòp per permetre l’accès de totes los publics a las òbras, als documents e a las informacions que los interèssan, promòure la diversitat de las expressions culturalas dins la societat actuala e enfin permetre als occitanofòns, locutors o apreneires, d’aver de practicas culturalas en occitan.
En França e a l’estrangièr, lo CIRDÒC – Institut occitan de cultura acompanha las collectivitats publicas e lors establiments, las associacions e las entrepresas dins lors projèctes de creacion o desvolopament de fonses documentaris : en lenga occitana ; de descobèrta o estudi sus la lenga e la cultura occitanas.
Acompanhament de projècte
Lo CIRDÒC – Institut occitan de cultura acompanha tot portaire de projècte que son accion a per tòca la salvagarda, lo desvolopament de las coneissenças e la valorizacion del patrimòni cultural occitan.
Corses e talhièrs, lenga e cultura occitanas
La Mediatèca (site de Besièrs) propausa de corses, talhièrs e formacions adaptats a totes los nivèls e totes los usatges en partenariat amb los organismes de formacion professionala, notadament lo Centre de formacion professionala occitan Region Occitània (CFPO Region Occitània) e l’Establiment d’ensenhament superior occitan APRENE.
L’Etnopòle (site de Vilhèra) propausa tanben un cors d’occitan e mantun tipes de formacions al Patrimòni Cultural Immaterial.
