Condicions generalas per la reproduccion o la numerizacion de documents
Tot document eissit de las colleccions del CIRDÒC – Institut occitan de cultura pòt èsser reprodusit a l’excepcion de :
- document somés al drech d’autor o a una restriccion legala (veire las condicions especificas : reprodusir un document jos drech) ;
- document que son estat fisic ne limita las condicions e modalitats de reproduccion (veire las condicions especificas : reprodusir un document patrimonial) ;
- document qu’a una version numerizada accessibla en linha (veire las condicions especificas : …)
Per obténer una reproduccion, devètz èsser aderent als servicis del CIRDÒC – Institut occitan de cultura. L’adesion, gratuita pels particulars, se pòt far al meteis temps que la vòstra demanda. Tota demanda de reproduccion de document se deu far pel formulari Question-Responsa.
Vòli reprodusir de documents, qu’ai lo drech de far ?
La còpia de las òbras e documents meses a la vòstra disposicion dins l’encastre dels servicis de la Mediatèca e de l’Etnopòle es possibla pas que jos resèrva del respècte de la legislacion en aplicacion.
Mèfi :
- emai aguèssetz obtengut lo drech de reproduccion, pas cap de difusion o espleitacion publica d’una òbra editada jos drech es possibla sens l’autorizacion dels possessors del drech ;
- la reproduccion, la difusion o l’espleitacion publica d’un document pas editat (manuscrit o archiu textual, fotografic, sonòr, audiovisual) es possibla pas qu’amb l’acòrd dels possessors del drech.
Lo CIRDÒC – Institut occitan de cultura es a la vòstra disposicion per vos acompanhar dins l’encastre de vòstre projècte de reproduccion, d’edicion, representacion, espleitacion publica de tot o part de las òbras.
Sus plaça, a la Mediatèca o a l’Etnopòle, podètz sollicitar los agents d’acuèlh e d’entresenha. A distància, podètz utilizar lo servici question-responsa.
Reprodusir o demandar la reproduccion d’un document jos drech
S’agís :
- d’una òbra divulgada o editada ;
- que son creator es viu o defuntat dempuèi mens de 70 ans ;
- dins lo cas d’òbras anonimas, 70 ans aprèp la publicacion ;
- un jornal o una revista que pareguèron dempuèi mens de 70 ans.
Al títol d’una demanda de còpia per un usatge estrictament personal e privat (sens edicion, difusion o espleitacion publicas), podètz reprodusir o obténer la reproduccion :
- del contengut d’un libre o d’una particion jos drech dins lo limit de 10 % del volum de l’obratge ;
- del contengut d’una revista o d’un magazina jos drech dins lo limit de 30 % del volum del numèro.
Per obténer una còpia mai importanta o integrala de libres, particions, revistas, deuretz obténer l’autorizacion escrita dels possessors del drech.
Per obténer una còpia, parciala o integrala d’òbras sonòras, musicalas e audiovisualas l’autorizacion escrita dels possessors del drech es obligatòria.
Pels documents pas editats (manuscrits, archius sonòrs, filmats, fotografics), d’autorizacions pòdon tanben èsser necessàrias. Los bibliotecaris, las bibliotecàrias e los e las documentalistas vos informaràn segon la natura dels documents e lor estatut.
Per las òbras editadas jos drech podètz tanben demandar un prèst entre bibliotècas.
Pòdi far una còpia per un usatge privat amb mon pròpri material ?
L’encastre legal de la còpia dicha « privada » fa excepcion pasmens. Es estrictament enquadrada per la lei (article L122-5 del Còdi de la proprietat intellectuala). Per èsser considerada coma una còpia privada, la font de vòstra còpia deu èsser :
- una òbra divulgada (un libre, un disc, un filme editats mas pas un manuscrit, un archiu sonòr o audiovisual) ;
- licita (es lo cas de l’ensemble de las colleccions de l’establiment).
En mai, la còpia deu èsser facha amb vòstre material personal, e estrictament reservada a un usatge personal, sens pas cap de fòrma de divulgacion.
Lo CIRDÒC vos pòt doncas pas enebir de far una còpia privada de la documentacion en accès liure del moment que l’encastre definit çai-sus es respectat.
La còpia privada realizada amb vòstre material personal es gratuita e pòt pas donar luòc per part de l’establiment a cap fòrma de redevença.
Restriccions possiblas per de rasons de conservacion
Pasmens, al títol dels imperatius de conservacion, tota practica de còpia susceptibla de degradar los documents serà interdicha.
Dins lo cas de las colleccions en accès indirècte (colleccions patrimonialas), la còpia, e mai per un usatge privat, es doncas somesa a l’autorizacion prealabla, quitament l’enquadrament se necessari, d’un agent del Pòl Patrimòni e Sabers per tal de metre pas en perilh las òbras o documents.
Pòdi editar o difusar publicament de ressorsas consultadas al CIRDÒC ?
Per tot projècte d’edicion, difusion, projeccion o espleitacion publicas de ressorsas, òbras e documents consultats al CIRDÒC, podètz sollicitar l’administracion del Centre per vos conselhar, vos orientar e vos ajudar dins vòstres procediments.
Lo CIRDÒC declina tota responsabilitat s’un utilizator fa una espleitacion fraudulosa dels documents consultats o manlevats.
Reprodusir o numerizar de documents sus plaça
Per tota demanda que concernís los materials, servicis e condicions de reproduccion o de reütilizacion dels documents, los agents del CIRDÒC – Institut occitan de cultura son a la vòstra disposicion per vos entresenhar e vos assistir.
Materials e servicis de reproduccion o numerizacion sus plaça
La Mediatèca (site de Besièrs) e l’Etnopòle (site de Vilhèra) vos propausan de servicis e materials de reproduccion de documents :
- fotocòpias negre e blanc o color A4/A3
- escanèr A3
- servici de reproduccion fotografia
- servici de numerizacion de supòrts sonòrs
- servici de numerizacion de supòrts audiovisuals
- servici de numerizacion de supòrts fotografics (placas de veire, diapositivas, etc.)
L’accès a l’ensemble d’aqueles servicis es condicionat per l’adesion individuala o professionala als servicis del Centre e a un acompanhament per part dels agents.
D’unes servicis pòdon donar luòc a una tarificacion : veire las Tarifas.
Podètz tanben utilizar vòstres materials de reproduccion pròpris, segon las condicions fixadas çai-sus.
Far una demanda de reproduccion e de provision a distància
Per las demandas de reproduccion e de provision a distància, las condicions descrichas çai-sus s’aplican.
1/ Reprografia e mandadís postal
Per las òbras e documents escriches jos drech dins lo limit de 10% del volum per un libre o una particion e 30% del volum per una revista o un magazina.
Pels autres tipes de documentacion jos resèrva de provesir l’autorizacion dels possessors de drech.
Far una demanda : mercés d’utilizar lo servici question-responsa.
2/ Numerizacion e mandadís per corrièl
Per las òbras e documents editats fòra drech (domeni public), pels autres tipes de documentacion jos resèrva de provesir l’autorizacion dels possessors de drech, la numerizacion e lo mandadís per corrièl es possible.
Far una demanda : mercés d’utilizar lo servici question-responsa.
3/ Prèst entre bibliotècas
Lo CIRDÒC – Institut occitan de cultura met sas colleccions a la disposicion del malhum documentari nacional e internacional per l’intermediari del prèst entre bibliotècas (PEB).
Las òbras e documents unics, ancians o fragils pòdon pas far l’objècte d’un PEB mas pòdon èsser numerizats.
Lo CIRDÒC – Institut occitan de cultura pòt èsser tanben vòstra bibliotèca-relai per tota demanda de PEB alprèp d’una bibliotèca en França o a l’estrangièr. Las condicions de consultacion son determinadas per la bibliotèca prestaira en çò que concernís la durada de prèst, la possibilitat de reproduccion o pas, e lo còst del mandadís.
Demandar lo mandadís de documents del CIRDÒC dins vòstra bibliotèca :
Per obténer un document, devètz aver recors a una bibliotèca-relai que transmetrà la vòstra demanda e recebrà lo document. Entresenhatz-vos alprèp de vòstra bibliotèca publica o universitària que vos indicarà lo foncionament de seguir.
Per tota question o l’identificacion d’una bibliotèca-relai dins las vòstras environas, trantalhetz pas a far vòstra demanda pel servici question-responsa.
Condicions e tractament de vòstras demandas de reproduccion e provision a distància
Lo tractament de vòstra demanda serà fach dins un relambi maximal de 15 jorns. Se lo delai pòt pas èsser tengut per de rasons tecnicas (numerizacion de documents o supòrts particulars), lo delai de tractament vos serà indicat. En cas d’urgéncia, mercés d’o precisar dins la vòstra demanda.
Tarifas
- fotocòpias, estampatges (negre e blanc o color) : 0,10 € / pagina
- mandadisses postals : tarifa d’afranquiment en aplicacion
- prèst entre bibliotècas : facturacion pròpria al servici
Per tota demanda, vos indicarem abans lo còst de la prestacion.
Totes los autres servicis associats (recèrca, numerizacion, mandadís per corrièl) son assegurats a gratis.
