La Mediatèca (site de Besièrs) propausa de corses, talhièrs e formacions adaptats a totes los nivèls e totes los usatges en partenariat amb los organismes de formacion professionala, notadament lo Centre de formacion professionala occitan Region Occitània (CFPO Region Occitània) e l’Establiment d’ensenhament superior occitan APRENE.
L’Etnopòle (site de Vilhèra) propausa tanben un cors d’occitan e mantun tipes de formacions al Patrimòni Cultural Immaterial.
MEDIATÈCA OCCITANA
S’iniciar a l’occitan (Debutants grands) : Los talhièrs « Cultiva ton òc »
La Mediatèca e lo CFPO Region Occitània organizan regularament de sessions d’iniciacion a l’occitan que permeton de mestrejar rapidament las basas de la comunicacion orala e escrita. Dotze sessions de doas oras qu’altèrnan talhièrs « lenga », assegurats per un formator o una formatritz professional-a en lenga occitana, e talhièrs de practica o descobèrta culturala – « cultura » – que mesclan immersion lingüistica e descobèrta del patrimòni, de la creacion, de l’actualitat culturala en occitan.
Cors obèrt a totas e a totes, sus inscripcion.
Tarifa : a gràtis sus presentacion de l’abonament a la Mediatèca (informacions practicas).
Lo cors setmanièr del CFPO Region Occitània a la Mediatèca occitana
Cada setmana, una ora e mièja de cors per un aprendissatge en immersion de l’occitan. Cors per debutants e de perfeccionament.
Nivèl debutant (A…) : Cors cada dimècres de 10h a 11h30 (fòra de las vacanças escolaras). Formacion per començar dins la practica orala e escrita de l’occitan (lengadocian).
Nivèl perfeccionament (B…) : Cors cada dijòus de 17h30 a 19h (fòra de las vacanças escolaras). Formacion de perfeccionament en practica orala e escrita de l’occitan (lengadocian).
Informacions, tarifas e inscripcions alprèp del CFPO Region Occitània :
https://www.cfpoccitan.org/apprendre-loccitan/cours-occitan/
Se perfeccionar : Los talhièrs « Cafè Gramatica »
Pels professionals, locutors e apreneires (nivèl B2) que desiran aquesir una coneissença aprigondida de la gramatica de la lenga occitana, o qu’an de questions de lenga que vòlon pausar a un especialista.
La Mediatèca occitana e l’establiment d’ensenhament superior Aprene vos propausan un còp per mes, de venir encontrar e escambiar amb Florian Vernet, ancian professor a l’universitat Paul-Valéry Montpelhièr-III e director del departament d’occitan, lingüista e escrivan, autor entre autre del Dictionnaire grammatical de l’occitan moderne (Presses universitaires de la Méditerranée, 2007).
L’ofèrta propausa d’abordar las questions de mestritge lingüistic e gramatical d’un biais dirècte, natural e a partir de las questions o dels problèmas concrèts qu’encontran los locutors.
>>> L’ofèrta d’autoformacion a la Mediatèca occitana
Dins l’espaci « Lengatèca » de la Mediatèca, accedissètz a totas las aisinas e metòdes d’autoformacion o de practica de la lenga occitana.
Los bibliotecaris e las bibliotecàrias del Centre son tanben a la vòstra disposicion per vos ajudar a identificar las aisinas, las ressorsas o las formacions existentas que convenon a vòstre nivèl, vòstres besonhs, vòstres usatges.
Enfin, lo portal cultural Occitanica (occitanica.eu) propausa tanben de ressorsas d’autoformacion o de practica en linha : Labo de lenga
>> Talhièrs e estagis del CIRDÒC-Institut occitan de cultura
Desvolopar un projècte, metre en plaça un plan de comunicacion, transmetre la cultura occitana mercés a las aisinas del numeric… Los « Talhièrs » de la Mediatèca occitana vos propausan d’abordar diferents cases concrèts, de beneficiar de retorns d’experiéncias e conselhs desliurats per de professionals per capitar vòstres projèctes culturals. S’adreçan tant als professionals coma als benevòls de las estructuras portairas de projèctes de valorizacion de la lenga e de la cultura occitanas.
Lo Centre interven tanben alprèp de las universitats, escòlas e organismes de formacion dins sos domenis d’expertesa, en particular :
- gestion e valorizacion dels fonses documentaris occitans ;
- coneissença, collècta e valorizacion del patrimòni cultural immaterial ;
- valorizacion numerica e accès innovants al patrimòni cultural ;
- formacion dels bibliotecaris e de las bibliotecàrias (lectura publica, patrimòni) a la gestion e valorizacion de fonses o de projèctes occitans ;
- formacion a la cultura occitana e a la gestion de projèctes de sa valorizacion a destinacion dels professionals del torisme e de la cultura ;
- TICE per l’ensenhament o la sensibilizacion a l’occitan en classa.
ETNOPÒLE
Lo cors setmanièr d’occitan de l’UTLA a l’Etnopòle
Cada setmana, l’Universitat del temps liure d’Aquitània – Pau organiza una ora e mièja de cors per un aprendissatge de l’occitan en immersion. Cors per debutants e de perfeccionament.
Cors cada dimècres de 14h30 a 16h00 (fòra de las vacanças escolaras). Formacion per començar dins la practica orala e escrita de l’occitan dins sa fòrma bearnesa, gascona.
Informacions, tarifas e inscripcions alprèp de l’UTLA – Pau :
https://utla.univ-pau.fr/site/?page_id=1255
Formacion al Patrimòni Cultural Immaterial (PCI) de l’Etnopòle
>> La setmana de formacion annadièra
En collaboracion amb l’Universitat de Pau e dels Paises de l’Ador, e la Direccion generala del patrimòni del Ministèri de la Cultura e de la Comunicacion, una setmana de formacion es organizada a destinacion dels estudiants de Màster e dels professionals dels mestièrs del patrimòni.
Dels arcans de l’UNÈSCO e del Ministèri de la Cultura a l’enquèsta de terren ; de la redaccion de fichas d’inventaris a l’elaboracion d’un dorsièr de labelizacion ; de la realizacion d’archius bruts a lor valorizacion per d’aisinas numericas (sites, rets socialas) ; aquesta formacion abòrda las questions d’inventari e de salvagarda del PCI tant suls plans teorics coma practics.
Coma lo patrimòni cultural immaterial impausa una expertesa partejada entre practicians, cercaires e institucions patrimonialas, aquesta co-construccion es mesa a l’espròva cada an sus de tematicas precisas en partenariat amb d’actors dels territòris concernits.
>> La formacion a la carta
L’Etnopòle organiza de formacions al PCI alprèp de professionals que ne fan la demanda per tal de respondre a d’elements precises de lors projèctes. Aquesta formacion pòt tractar del PCI tan d’un biais general coma d’elements particulars del PCI occitan.
Coma aquesta formacion es a la carta e co-construsida en foncion dels projèctes, s’organiza a la demanda dels professionals e a pas d’encastre predeterminat, per tal de respondre melhor a la demanda.
>> L’intervencion dins d’autras formacions
Lo personal de l’Etnopòle interven tanben dins de formacions universitàrias o professionalas. Los organizators d’aquestas formacions fan apèl al nòstres servicis per çò que concernís lo PCI occitan a totas las etapas de son tractament, de l’inventari a sa valorizacion, en passar pel tractament de las donadas e lor conservacion.
