Prèstes de supòrts d’animacion e materials educatius

Per ne beneficiar

L’ofèrta es disponibla per tot professional o organisme public o privat d’ensenhament, d’animacion, d’educacion artistica, d’accion culturala etc. Veire carta “collectivitat, persona publica, entrepresa o associacion aderenta”.

Lo pòl Publics e cooperacion e los bibliotecaris e las bibliotecàrias del CIRDÒC se tenon a la vòstra disposicion per vos ajudar a seleccionar las ressorsas mai adaptadas al vòstre projècte. Trantalhetz pas a nos contactar.

Kamishibaï en occitan

Coneissètz lo kamishibaï ? Aquel supòrt que nos ven de Japon, plebiscitat pels mai pichons, permet de legir d’istòrias en votz nauta en far desfilar de grands cartons illustrats.
En 2012 lo CIRDÒC clavèt un acòrd de coedicion amb un editor pels joves especializat (Lirabelle, Gard) per tal de propausar al prèst 10 títols de kamishibaï occitan. Davant lor succès, d’editors prenguèron la seguida e propausan d’ara endavant dins lor catalòg de kamishibaï en occitan, que la Mediatèca ne fa regularament l’aquisicion.

Podètz manlevar los kamishibaï dins las meteissas condicions que los autres obratges de la Mediatèca. Retrobatz-los dins los espacis “Pichonetèca” e “Lengatèca”.

Un castelet o butaï (supòrt de fusta) pòt èsser mes a la vòstra disposicion per vòstra animacion (3 setmanas maximum) a l’acuèlh de la Mediatèca.

A l’entorn del conte : Los Amics de Joan de l’ors

Los amics de Joan de l’Ors prenon vida jol trach de l’illustrator Jean-Christophe Garino dins aquesta exposicion coprodusida amb l’IEO d’Aude.
Mena pichons e grands a l’encontre dels personatges emblematics de la literatura orala occitana : la formiga, lo vailet, Gran de milh… e plan segur Joan de l’ors !
Una maleta tematica a l’entorn del conte la pòt venir completar.

L’exposicion es disponibla en occitan lengadocian o gascon amb mesa a disposicion de las traduccions multilingüas dels tèxtes (tèxtes, visuals e enregistraments sonòrs consultables sus la Maleta).

Mon primièr erbièr de fuèlhas

Dins l’encastre del cicle tematic Occitan : lenga viva, lenga del viu – La botanica e la transmission dels sabers, lo CIRDÒC – Institut occitan de cultura s’associèt amb l’agença creativa OKIDOKID (31) per crear un erbièr de fuèlhas subrebèl, tot en occitan. Subrebèl… e plan practic !

Lo tèxte d’aquela version en occitan lengadocian foguèt adaptat per l’etnobotanista Josiana Ubaud. Siloètas, fruches, caracteristicas… 15 arbres de descobrir al fial de las paginas, concebudas per abrigar e conservar los tresaurs de fuèlhas collectadas amb grand suènh dins la natura per pichons e bèls.

En acompanhament de la mòstra Lenga viva, lenga del viu (telecargar la ficha de l’exposicion), que nos mena a la descobèrta dels erbièrs mas tanben dels mila usatges de las plantas fachas per las societats umanas d’ièr e d’ara, d’exemplars de Mon primièr erbièr de fuèlhas son propausats gratuitament per lors classas als partenaris ensenhaires, animators e mediators del patrimòni dins l’encastre de projèctes d’educacion artistica e culturala tant coma de projèctes pedagogics transdisciplinaris, que crosan l’educacion al desvolopament duradís, las SVT, la literatura, las arts plasticas, la musica…

Primièrs passes dins la cultura occitana : trocèl d’animacion la CLAU (Cultura e Lenga Animadas Uèi)

Declinat a partir del dispositiu de mediacion concebut pel Centre pels festejaires de Total Festum, aqueste trocèl d’animacion vos provesís totas las claus per far descobrir la lenga e la cultura occitanas als vòstres publics d’un biais ludic, en sollicitar lors cinc senses.

De qu’es, l’occitan ? Ont se parla ? Cossí se legís ? Cossí se pronóncia… e ont ? Las telas tematicas illustradas (carta, botanica, gastronomia, nívol de mots, còrs uman…) e los accessòris meses a la vòstra disposicion (tauleta, bocals “d’erborista”…) vos daissaràn tot lo léser d’adaptar lo percors descobèrta al vòstre public.
Una seleccion d’obratges manlevats a la Mediatèca poiràn venir completar lo dispositiu, que se pòt tanben associar a lo de las “Sièstas sonòras”.

Lo trocèl s’acompanha d’un libret :

• pels mai joves (fins a 12 ans) Mon quasèrn d’activitats occitan (Illustrat per Guillaume Dethorey)
• pels mai grands (13 a 113 ans) lo Trocèl de Primièrs secorses occitans (Illustrat per Bernard Cauhapé) e de fichas-jòcs tematicas

Sièstas sonòras

Lo Fonotecari de la Mediatèca occitana a preparat pel vòstre public un viatge dins la creacion musicala occitana, a travèrs del temps e dels estiles.
Una bòrna d’escota, de cascos, de transats mofles, e de cartas que vos descrivon… pel menut çò que tastan las vòstras aurelhas. La recèpta d’una pausa musicala occitana capitada pel vòstre eveniment o vòstra animacion !

Iniciacion a la practica esportiva

Volètz propausar una iniciacion al jòc de bala al tambornet ? La Mediatèca occitana met a la disposicion dels establiments escolars e collectivitats un jòc de 18 tambornets e de balas.
Per anar mai luènh dins la descobèrta dels jòcs e espòrts tradicionals e aliar la teoria a la practica, podètz tanben manlevar l’exposicion que lor es dedicada : Mai lèu, mai naut, mai fòrt.

Enquèsta interactiva « Qui a matat Francés Canat ? »

Entre BD talha reala, jòc vidèo e « murder party », « Qui a matat Francés Canat ? » es una enquèsta interactiva imaginada per l’Atelier In8. Dins aquesta version integralament en occitan coprodusida pel CIRDÒC, cabussatz dins l’univèrs del polar mercés a la realitat aumentada. (Aplicacion disponibla dins Google Play e dins l’AppStore).

Devinaretz qual a tuat Francés Canat ? Sol o en còla, armat d’una de las tauletas provesidas o del vòstre telefonet, percorreretz los panèls de la BD (7 panèls autoportants), escotatz plan los testimònis, cercatz los indicis e menatz l’enquèsta ! Una animacion ludica de menar amb vòstres escolans, estudiants, usatgièrs… per practicar la compreneson orala de l’occitan dins sas variantas.
Lo CIRDÒC propausa lo dispositiu complèt al prèst :

Retrobatz tanben en linha dins la Maleta de ressorsas per anar mai luènh :

• Autopsia del polar, un libret de 40 paginas per descobrir lo genre del roman policièr jos totas sas fòrmas e sas encarnacions occitanas (concepcion : Atelier In8 ; adaptacion : Yan Lespoux, Cecilia Chapduèlh, CIRDÒC) ;
• L’integralitat dels dialògs (tèxtes e sons) de telecargar (Adaptacion e voses occitanas : Danis Chapduèlh, Caroline Dufau, Yves Durand).

Exposicion « Ua lenga, l’occitan »

La tòca de l’exposicion itineranta « Ua lenga, l’occitan » es de promòure la coneissença de l’istòria prestigiosa de la lenga occitana, de sas originas fins ara, dins l’ensemble lingüistic occitan e quitament endacòm mai. Emai l’exposicion s’adrecèsse al grand public, visa particularament los collegians e los liceans, que fòrça ignòran l’existéncia de l’occitan. Concebut per Maurice Romieu e Jordi Fernandez-Cuadrench, l’expausat conta en 22 panèls bilingües l’essencial de l’istòria de la lenga per sièis axes tematics grands :

• La presentacion de la lenga occitana ;
• La civilizacion dels trobadors (sègles XI – XII) ;
• La crosada contra los catars e sas consequéncias (sègles XIII – XV) ;
• La resisténcia occitana (sègles XVI –XVIII) ;
• La renaissença occitana (sègles XIX –XX) ;
• La lenga occitana a l’ora d’ara e doas vidèos  : « La Crosada » e « L’occitan a l’ora d’ara ».

Maleta d’animacion “Paroles de pays/Paralaus de país : escapada occitana” de l’IEO Auvèrnha, Borbonés, Velai

Aquela maleta concebuda e editada per la seccion Auvèrnha-Borbonés-Velai de l’Institut d’Estudis Occitans permet una iniciacion ludica a la lenga e la cultura occitanas : s’i retròban jòcs (memòri, sèt familhas), carta, kamishibaï, fichas d’activitat…

Destinada a apiejar los ensenhaires, los animators e las animatrises socioculturals e los mediatecaris e las mediatecàrias dins lors activitats amb d’enfants a partir de 7 ans, tan coma amb un public familial, la maleta s’acompanha d’un libret pedagogic mas tanben de fichièrs sonòrs de retrobar dins la Maleta d’Occitanica.

La maleta es disponibla al prèst fins a un mes per d’animacions, sus reservacion.

Ressorsas en linha

Fòrça contenguts, regularament actualizats e enriquits, son dirèctament accessibles dins la Maleta d’Occitanica.