Ressorsas numericas

Lo CIRDÒC – Institut occitan de cultura, bibliotèca granda de la lenga e de la cultura occitanas, Etnopòle pel patrimòni cultural immaterial occitan, actor de la cooperacion amb los sectors educatius, universitaris, culturals e las collectivitats territorialas, coordina dins l’encastre de sas missions un projècte numeric grand per l’occitan al sègle XXI : la constitucion progressiva d’un metaportal grand d’accès a las ressorsas e a las informacions numericas occitanas.

Lançat en 2011, lo projècte Occitanica cobrís a l’ora d’ara los camps de la documentacion (La Mediatèca), de la creacion actuala (La Fabrica), de la coneissença del patrimòni (L’Enciclopèdia), del Patrimòni cultural immaterial (PCI Mondes) e de las ressorsas educativas (La Maleta e DaquiDoc).
Amb lo projècte Occitanica, fòrça autres portals e aisinas d’informacion numerics son desvolopats e administrats pel Centre en cooperacion amb un molon de partenaris.

Los portals tematics d’Occitanica

La Mediatèca : documentacion e patrimòni numerizat en linha

Al dintre de la Mediatèca d’Occitanica trobaretz lo patrimòni numerizat, la documentacion numerica, produsits pel CIRDÒC-Institut occitan de cultura e las bibliotècas, archius, centres de ressorsas e organismes partenaris (tèxtes, imatges, vidèos, son). I trobaretz tanben las aisinas d’autoformacion a la lenga occitana (Lengatèca), lo referenciament dels sites web en occitan (Webotèca) e las produccions de la recèrca actuala, captacions de jornadas d’estudi e collòquis, tèsis e memòris, articles que provenon de las universitats e centres de recèrca partenaris (Campus).
Accès dirècte : https://occitanica.eu/mediateca

La Fabrica : lo portal de l’actualitat creativa occitana

La Fabrica met a disposicion, al dintre de La Basa, un repertòri d’artistas, creators/creatrises e creacions actualas en occitan, un catalòg de parucions (libres, CD, DVD), una agenda collectiva dels eveniments occitans e de las ressorsas pels actors e actrises de la creacion e de la cultura.
Accès dirècte : https://fabrica.occitanica.eu

La Maleta : ressorsas e aisinas educatius en linha

La Maleta recampa las produccions d’interès educatiu produsidas per l’establiment e sos partenaris educatius. Conten de ressorsas e aplicacions utilizablas dirèctament pel jove public per descobrir, aprene e practicar la lenga e la cultura occitanas. La Maleta albèrga tanben una bibliotèca de talhièrs educatius alimentada per las ensenhairas e pels ensenhaires que desiran partejar lors ressorsas e aisinas d’ensenhament de l’occitan o de diferentas matèrias en occitan.
Accès dirècte : https://maleta.occitanica.eu

L’Enciclopèdia : coneissença del patrimòni occitan

L’Enciclopèdia publica los trabalhs del pòl Patrimòni e Sabers del CIRDÒC suls elements, òbras, còrpuses, expressions que constituïsson lo patrimòni occitan dins sa riquesa e sa diversitat tota :

• patrimòni documentari : centres de ressorsas, fonses documentaris, òbras o còrpuses remarcables ;
• actrises e actors : personalitats que son ligadas a las creacions, expressions, movements occitans (notadament los articles del projècte Vidas, diccionari biografic del movement occitan) ;
• luòcs : los luòcs de memòria, lo patrimòni toponimic de las comunas, etc. ;
• immaterial : las practicas e expressions culturalas vivas (patrimòni cultural immaterial).

Accès dirècte : https://occitanica.eu/enciclopedia

Los autres sites e portals de ressorsas

Sondaqui, lo patrimòni cultural immaterial d’Aquitània

Sondaqui es lo site de referéncia pel Patrimòni Cultural Immaterial occitan en Region Aquitània : descobrissètz tota la riquesa dels cants, danças, musicas, saber-far de la region. Dintratz dins los rendètz-vos festius grands. Accedissètz als fonses d’archius eissits de las collèctas oralas e visualas passadas e contemporanèas. Sondaqui es una produccion del CIRDÒC-Institut Occitan de Cultura, serà lèu integrat coma portal del PCI occitan dins son ensemble al dintre d’Occitanica.
Accès dirècte : http://www.sondaqui.com/

PCILab : Portal de l’Inventari francés del PCI

Creat e animat pel CIRDÒC-Institut occitan de cultura, jos la mestria d’obratge del ministèri de la Cultura, PCILab permet l’accès, pel grand public, a l’Inventari francés del patrimòni cultural immaterial (PCI).
Aqueste site valoriza a l’ora d’ara 434 practicas e saber-far inscrits a l’Inventari francés del PCI, que 17 son inscrits a l’UNÈSCO. Dins un contèxte de diversitat culturala e lingüistica, en explorar las possibilitats de navegacion ofèrtas pel web semantic e la mesa en relacion de las donadas culturalas « ligadas » per tal de restituir al mai juste los sistèmas de practicas e de saber-far del PCI, PCILab a per objectiu de facilitar l’accès a l’inventari francés del PCI a de publics novèls e de promòure la collaboracion en linha a l’inventari gràcias a un ligam privilegiat amb l’enciclopèdia liura Wikipèdia.

Accès dirècte : https://www.pci-lab.fr/

Vidas : diccionari biografic en linha dels actors del movement occitan

Produsit en partenariat amb l’Universitat Paul-Valéry-Montpelhièr-III e la còla de recèrca Lengas, Literaturas, Arts e Culturas del Sud (LLACS), Vidas es un projècte de diccionari biografic en linha dels actors e actrises dels movements de la renaissença occitana de la debuta del sègle XIX fins ara.
Accès dirècte : http://vidas.occitanica.eu

Daquidòc

Daquidòc es la plataforma numerica creada en concertacion amb la DRAC e la region Nòva Aquitània, lo rectorat de l’Acadèmia de Bordèu. Elaborat d’un biais bilingüe francés-occitan, es estat desvolopat per acompanhar los projèctes d’educacion artistica e culturala (EAC) a destinacion dels ensenhaires e ensenhairas de totes cicles (de la primària al licèu). Lo site dispausa de mantuna foncionalitats que comprenon a l’encòp la recèrca de ressorsas, lo depaus e la valorizacion de projèctes educatius realizats dins l’encastre de l’EAC, tan coma de tutorials d’inscripcion e de mesa en plaça d’una accion al dintre dels establiments que se tròban en Nòva Aquitània.

Accès dirècte : https://www.daquidoc.org/

Trobadors d’Aquitània

Trobadors d’Aquitània, l’art dels poètas-musicians de lenga d’òc accessible en linha, creat per l’Institut occitan en partenariat amb la Banca numerica del saber d’Aquitània (BnsA) e en cooperacion amb l’associacion Trobadas e la medievista Katy Bernard de l’Universitat Bordèu Montaigne, propausa de descobrir las grandas figuras aquitanas de l’art del trobar. Accedissètz a las ressorsas numericas de l’eretatge dels princes trobaires de mots e de sons e descobrissètz tota l’actualitat de lor interpretacion.

Accès dirècte : http://trobar-aquitaine.org/

Totemic

La federacion Totemic dels totèms occitans e catalans, causiguèt Occitanica e lo CIRDÒC-Institut occitan de cultura per desvolopar son site d’informacion e d’escambi a l’entorn del patrimòni cultural immaterial e festiu que fan viure, valorizan e transmeton.

Accès dirècte : http://totemic.occitanica.eu

Hautbois et Cie

L’associacion Hautbois et Cie a per objècte la valorizacion e la promocion dels autbòis dins lor diversitat e lors practicas tan tradicionalas coma creativas. La Federacion dels Allumés Des HAutbois causiguèt Occitana e lo CIRDÒC-Institut occitan de cultura per desvolopar e albergar son site d’informacion.

Accès dirècte : https://hautbois.occitanica.eu

50 ans de borbolh occitan

Coprodusit per l’Institut nacional de l’audiovisual (INA) e lo CIRDÒC-Institut occitan de cultura, lo site « 50 ans de borbolh occitan : cultura e movements occitans de 1968 fins ara » conta las grandas transformacions culturalas, socialas e economicas contemporanèas a travèrs de centenats de vidèos e documents de còps inedits (archius sonòrs, fotografias, revistas, etc.), eissits a l’encòp de las colleccions audiovisualas publicas e dels archius conservats al CIRDÒC.
Accès dirècte : https://fresques.ina.fr/borbolh-occitan

Participar, contribuir e rejónher lo projècte Occitanica

Tot actor public o privat detentor o productor d’informacion, de coneissenças, de ressorsas numericas en occitan o sus la cultura occitana pòt venir partenari e contributor del projècte Occitanica.

Pòt èsser :

• per las bibliotècas, archius e centres de ressorsas : de referenciar sas ressorsas numericas al dintre del portal collectiu, de participar a de programas de numerizacion o de valorizacion numerica ;
• pels mèdias associatius : d’archivar e valorizar sos archius numerics ;
• per las universitats e organismes de la recèrca universitària o scientifica : de referenciar las produccions escampilhadas (UOH, sites d’universitat, de revistas en linha), de contribuir en publicar o coprodusir amb lo CIRDÒC-Institut occitan de cultura de ressorsas originalas (captacions de jornadas d’estudi, edicion electronica d’archius scientifics obèrts, produccion de contenguts o d’espacis numerics d’interès universitari) ;
• per las associacions d’accion culturala : de participar al referenciament e a la promocion d’artistas, de creacions, d’eveniments al dintre de la Fabrica, de referenciar sas ressorsas culturalas numericas escampilhadas, d’obténer un espaci de publicacion numeric, al dintre d’un portal collectiu grand, per sas ressorsas e produccions culturalas.