Lo CIRDÒC – Institut occitan de cultura es estat certificat Colleccions d’Excelléncia per lo Gropament d’interès scientific (GIS) CollEx-Persée. Aquel labèl prestigiós es atribuit per una jurada e sus dorsièr als còrpus o als fonses documentaris que presentan de qualitats remirablas e unicas. Las colleccions del CIRDÒC – Institut occitan de cultura recampan mai de 150 000 òbras e documents de l’Edat Mejana fins a uèi : monografias imprimidas, libres ancians e contemporanèus rars, títols de revistas e publicacions periodicas, fonses d’archius privats, fonses sonòrs, iconografics e audiovisuals, ressorsas e documentacions tractant del patrimòni cultural immaterial… Aquestas colleccions cobrisson la literatura, la lingüistica, l’istòria sociala e politica, los aspèctes culturals tradicionals e actuals dels païses d’Òc. Mercés a la certificacion, las colleccions del domeni occitan e la politica de valorizacion de l’establiment public se veson resconegudas, per lors nautas valors scientificas al nivèl nacional e internacional.
