Politica de las colleccions
« Lo CIRDÒC – Institut occitan de Cultura es l’organisme public de vocacion nacionala e internacionala cargat de la salvagarda, de la coneissença e de la promocion de la cultura occitana. A notadament per mission :
- de recampar, produsir, difusar las ressorsas e los sabers del domeni occitan dins una amira enciclopedica, (…)
- d’obrar a la conservacion del patrimòni artistic, scientific e documentari en lenga occitana, en particular en gerir e desvolopar una colleccion publica de referéncia nacionala e internacionala dins son domeni per crompas, recepcion de dons, legats e depauses dins l’encastre d’una politica d’aquisicion definida dins son projècte d’establiment ; … »
(Estatuts de l’establiment)
Las colleccions patrimonialas geridas pel CIRDÒC – Institut occitan de cultura incluson l’ensemble de las òbras, de las ressorsas e dels documents aquesits d’un costat per assegurar la salvagarda perenna de lors supòrts e de lors contenguts ; d’un autre costat per constituir un material utile al desvolopament de las coneissenças e de las creacions.
Se devon destriar de las colleccions d’usatge que comprenon las colleccions aquesidas pel prèst als publics e als organismes associats amb una tòca d’estudi, de trabalh o de lésers. Aquestas darrièras son pas objècte de mesuras de conservacion de long tèrme.
La politica de las colleccions seguís tres objectius principals :
- documentar l’istòria culturala, intellectuala, sociala de la lenga occitana e de sos locutors de sas originas fins ara ;
- valorizar lo patrimòni cultural constituit per l’ensemble de las expressions artisticas, scientificas, socialas, intellectualas occitanas – que sián fisicament presentas dins las colleccions o servadas endacòm mai ;
- constituir una banca de ressorsas enciclopedica e de referéncia internacionala que permeta de satisfaire las demandas e de contribuir als projèctes e a las accions qu’an de besonhs d’informacion e de documentacion en domeni occitan.
Per seguir l’actualitat de l’obrador de las colleccions (aquisicions remarcablas e obradors en cors), podètz consultar la rubrica « Obrador », blòg del pòl Patrimòni & Sabers.
Las colleccions patrimonialas
Eretièr de las colleccions del Centre internacional de documentacion occitana (1975-1995) e de l’Institut occitan (1996-2019), lo CIRDÒC – Institut occitan de cultura contunha sa mission istorica d’èsser la bibliotèca-conservatòri tan coma l’observatòri del patrimòni e de l’actualitat literaris, scientifics e documentaris occitans.
Las colleccions patrimonialas son regularament enriquidas per crompas, dons, legats e depauses. Dempuèi 2016, s’espandisson a las expressions numericas occitanas dins l’encastre de la mission d’archivatge numeric.
La gestion de las colleccions, de las ressorsas e dels sabers associats es organizada en departaments tematics :
Lo departament « Actualitat e Documentacion » recampa una part granda del fons de la « Bibliotèca occitana » (publicacions estampadas : libres contemporanèus, brocaduras, revistas, premsa e autras publicacions periodicas) e de colleccions documentàrias (literatura grisa, tirats a despart, efemèrs) que representan un volum de 35 000 monografias estampadas, 2 300 títols de revistas e publicacions periodicas e qualques milierats de dorsièrs documentaris (extraches de premsa, prospèctuses, papierons, documents divèrses) suls autor-a-s e personalitats, los collectius e associacions, los eveniments istorics o politics grands, las manifestacions culturalas, etc.
Lo departament « Actualitat e Documentacion » aquesís e consèrva tota parucion actuala d'expression occitana, constituissent una colleccion de documentacion contemporanèa que visa l'exaustivitat dins l'ensemble dels camps de l'edicion occitana. Los fonses del departament permeton de documentar l'ensemble de la vida culturala, intellectuala, scientifica, politica e sociala occitana dempuèi la mitat del sègle XIX e subretot de son actualitat al sègle XXI.
Aisinas de recèrca
- La documentacion estampada e las tèsis, los memòris e rapòrts son referenciats dins lo Catalòg, catalòg general de las colleccions : http://catalog.oc-cultura.eu
- Los dorsièrs documentaris, que seguisson una organizacion en serias tematicas e dorsièrs son referenciats dins la basa « Archius » amb los fonses d'archius e manuscrits.
http://archius.oc-cultura.eu
Nòta : Los dorsièrs documentaris son en cors de referenciament e figuran pas totes al dintre de la basa Archius. Contactar lo departament per tota demanda.
Fonses remarcables
- Edicion occitana contemporanèa (libres en occitan posteriors a 1800) e actualitat de l'edicion occitana (libres en occitan pareguts dempuèi 2000)
- Revistas, publicacions periodicas, cronicas
- Brocaduras e tirats a despart
- Literatura grisa, tèsis e memòris, rapòrts
- Dorsièrs documentaris
Òbras o còrpuses remarcables de descobrir en linha
Lo departament « Patrimòni escrit » consèrva los documents manuscrits e los imprimits anteriors a 1800, rares o precioses tan coma los archius privats.
Aisinas de recèrca
- Los imprimits ancians, rares o precioses son descrits e referenciats al dintre del Catalòg, catalòg general de las colleccions (quòtas CR)
http://catalog.oc-cultura.eu
La tièra complèta dels fonses conservats es donada dins la Basa. - Los archius e manuscrits son descrits al dintre de la basa Archius
http://archius.oc-cultura.eu
Nòta : los fonses d'archius privats son en cors de tractament e de referenciament. La tièra complèta dels fonses conservats es donada dins la Basa. Contactar lo departament per tota demanda.
Fonses
- Resèrva dels imprimits ancians : libres e imprimits occitans ancians (sègles XVI, XVII e XVIII)
- Resèrva dels imprimits contemporanèus rares o precioses (imprimits sègles XIX, XX e XXI rares, exemplars qu'an de caracteristicas remarcablas, libres d'artista, etc.)
- Manuscrits ancians e contemporanèus
- Fonses d’archius privats (archius d'escrivan-a-s, cercaire-a-s, associacions, artistas, companhiás, collectius, etc.)
Òbras o còrpuses remarcables
Lo departament « Musica e Fonotèca » consèrva la documentacion sus las òbras musicalas (particions, enregistraments), los e las artistas, los grops e festenals (archius e documentacion) e los fonses d'archius sonòrs (ràdios associativas, archius sonòrs privats o d'associacions).
Aisinas de recèrca
- La documentacion estampada (recuèlhs de cançons, particions) e los documents sonòrs editats (musica, tèxtes legits, documentaris sonòrs) son referenciats dins lo Catalòg, catalòg general de las colleccions.
http://catalog.oc-cultura.eu - Los archius o dorsièrs tematics suls artistas, grops e festenals son referenciats dins la basa Archius.
http://archius.oc-cultura.eu - Los archius sonòrs son referenciats dins la basa Mèdias.
http://medias.oc-cultura.eu
Nòta : los archius (documentaris e sonòrs) son en cors de tractament e de referenciament dins las basas. Per tota demanda, contactar lo departament.
Fonses
- Particions e musica estampada
- Discotèca : musica editada (vinils, caissetas, CD, etc.)
- Fonotèca : archius sonòrs (ràdios associativas, archius sonòrs de personalitats o organismes : conferéncias, collòquis, eveniments)
Òbras o còrpuses remarcables
Lo departament « Iconotèca, Filmotèca e Arts visualas » consèrva los fonses iconografics e audiovisuals, tan coma d'unes objèctes e òbras artisticas.
Las colleccions d'imatges, primièr, se declinan en diferents tipes en foncion dels supòrts (afichas, cartas postalas, fotografias, supòrts illustrats diches « efemèrs » - papierons, pegasolets, etc.). Lo tot constituís un ensemble de mantun desenats de milierats de documents, que los mai ancians datan del sègle XIX. Los fonses son plan regularament enriquits, al ritme dels dons, crompas, depauses e collèctas de documents.
Las colleccions audiovisualas, d'un autre costat, son repartidas entre fonses d'archius e colleccions de tipe « videotèca ». A aqueste títol, lo departament Filmotèca aquesís e consèrva tota òbra audiovisuala ancianament o novèlament editada d'expression occitana, sus supòrt analogic o numeric ; a per amira l'exaustivitat. Los fonses d'archius, per eles, concernisson las òbras e documents pas editats e/o eissits d'archius particulars (fonses depausats o donats per las associacions, cadenas de televisions occitanas, realizator-a-s, etc., captacions, documentaris, etc.).
Las colleccions d'objèctes e arts visualas, enfin, recampan las diferentas òbras de valor patrimoniala o artistica fòrta, arribadas al CIRDÒC per don, legats o crompa. Pòdon èsser d'òbras plasticas (esculturas, assemblatges), de pinturas sus tela, d'aquarellas, de tiratges fotografics, mas tanben de medalhas e d'objèctes particulars.
Fonses :
- Afichas, cartas e plans, estampas
- Dorsièrs de documentacion iconografics (fotografias, cartas postalas, documentacion iconografica sus las personalitats, eveniments, manifestacions socialas o culturalas, fonses fotografics privats de fotografes e d'organismes) : http://archius.oc-cultura.eu
- Videotèca : filmes e vidèos editadas
- Archius filmats : fonses d'archius filmats (realizator-a-s o organismes), dins la basa Mèdia : http://medias.oc-cultura.eu
- Objèctes, medalhas, instruments e matrises d'estampariá
- Artotèca : òbras d'art originalas
Nòta : los fonses de l’iconotèca e de la filmotèca son en cors de tractament e de referenciament. Per tota demanda, contactar lo departament.
Òbras o còrpuses remarcables
Lo departament « Archius oraus e documentacion etnografica » produsís, recampa e gerís las ressorsas e la documentacion relativas a las expressions e practicas que relèvan del patrimòni cultural immaterial de l’espaci occitan : enquèstas oralas, enquèstas etnograficas, documentacion sus totes supòrts.
Fonses :
- Archius sonòrs (collèctas e enregistraments ancians e numerizacions)
- Archius filmats (collèctas e enregistraments ancians e numerizacions)
- Bibliotèca e documentacion
Òbras o còrpus remarcables
Cooperacion per la salvagarda e la valorizacion dels archius del Patrimòni cultural immaterial occitan
Lo CIRDÒC – Institut occitan de cultura, en qualitat de centre de documentacion e d’etnopòle, jòga un ròtle d’expertesa en tèrmes de Patrimòni cultural immaterial (PCI), de collècta e de tractament de l’informacion (documentari e archivistic) en domeni occitan.
Lo CIRDÒC – Institut occitan de cultura assegura a l’encòp de missions d’assiténcia a la mestria d’obratge alprèp de partenaris culturals màgers (Archius departamentals de Nòva Aquitània, Universitat de Pau e dels Paises de l’Ador – laboratòri ITEM, Escòla dels Nauts Estudis en Sciéncias socialas – laboratòris LAHIC-IIAC, Universitat Humboldt de Berlin – Lautarchiv, associacions, …), mas tanben dins l’encastre de sas pròprias accions de salvagarda, de coneissença e de valorizacion del Patrimòni cultural immaterial occitan.
Missions d’assisténcia a mestria d’obratge :
- Localizacion e recensament de fonses d’archius privats ;
- Seguit del procediment de numerizacion ;
- Definicion de metodologias adaptadas de tractament de l’informacion ligadas al PCI e fonses d’expression occitana ;
- Collècta de la memòria e/o de las practicas vivas en lenga occitana.
Missions de mestria d’obratge :
- Formacion al PCI (collècta, inventari) ;
- Tractament documentari d’archius audiovisuals e sonòrs d’expression occitana e creacion de catalògs numerics ;
- Valorizacion del patrimòni audiovisual e sonòr (inventari, conferéncias, seminaris, exposicions) ;
- Editorializacion e mediacion numerica de fonses d’archius sonòrs de l’oralitat (Sondaqui, Portal occitan del PCI).