Plumas, Estudis de literatura d’òc modèrna e contemporanèa

e cada aucèu es una pluma
que sus lei nívols fai escrich
Robèrt Lafont

Un luòc novèl, en ligam amb las autras revistas

Dins lo païsatge de las revistas scientificas ligadas a la cultura occitana, coneissèm la venerabla Revue des langues romanes (nascuda en 1870, a orientacion filologica), Lengas (nascuda en 1977, a orientacion sociolinguistica), o encara La France Latine, venguda Revue d’études d’oc en 2014. S’aquelas revistas aculhisson regularament d’articles ligats a la literatura d’òc modèrna e contemporanèa, cap d’entre elas se limita a aquela question. Nos a donc semblat important de crear un espaci per de publicacions criticas sus la literatura d’expression occitana, sens voler de cap de biais concurrenciar l’existent nimai las revistas literàrias e publicacions culturalas (Gai Saber, Lo Diari, ÒC, o Reclams) mai viradas de cap a la creacion e que comptam ben de nos faire lo resson de caduna de sas parucions.
Aquela revista, que son projècte es nascut dins l’encastre d’un partenariat entre l’Universitat Paul-Valéry e lo CIRDOC, l’avèm nomenada Plumas per rendre omenatge a Robèrt Lafont, una figura màger de las Letras d’òc tant coma dels estudis critics, scientifics, qu’acompanhan aquela literatura millenària. La revista s’acararà a metre en lutz las « plumas » divèrsas e innombrablas que quitan pas, dempuèi lo periòd dich « modèrn » fins a uèi, d’ancorar la literatura occitana dins son temps.

Un espaci dobèrt

Aquela revista vòl èsser un luòc d’expression pels cercaires, universitaris o independents, un luòc de publicacion de dorsièrs tematics que lo subjècte ne serà causit per lo comitat de redaccion pro lèu abans la data de publicacion prevista, amb apèl a contribucions dubèrt largament. La revista poirà tanben aculhir d’actes de collòquis o jornadas d’estudis. Serà tanben una aisina de mesa a jorn bibliografica de las publicacions recentas.
D’uneis articles ancians (non disponibles en version numerica), sovent esparpalhats e esmarrats dins de publicacions non especificas i poiràn tanben trobar una plaça novèla. Aital, cada numèro contendrà a l’encòp de publicacions ja paregudas e vengudas impossiblas de trobar e de contribucions novèlas.
Plumas serà tanben un luòc dobèrt a las autras lengas de França, que los especialistas ne seràn sollicitats en foncion del contengut. Poirà tanben admetre un agach complementari e comparatista sus d’autras literaturas del monde, mai que mai aquelas que son representadas dins la còla de recerca LLACS-ReSo, en foncion de las activitats transversalas ont la literatura occitana dialogarà amb d’autras literaturas.
De segur, totas las fòrmas de la lenga d’òc (quinas que sián las grafias o los dialèctes, sota resèrva de coëréncia intèrna) auràn sa plaça dins la revista.

Modalitats scientificas e tecnicas de la publicacion

Lo comitat de redaccion velharà a la qualitat redaccionala e scientifica de cada contribucion ; los articles seràn evaluats « a l’avugle » (dobla evaluacion).
Totas las lengas seràn aceptadas dins la revista a condicion que l’article siá acompanhat de sa version francesa.
La publicacion electronica permetrà l’accès al pus grand nombre ; serà albergada pel CIRDOC, dins un primièr temps.

Per lançar la revista : un numero consacrat a Robèrt Lafont

Plumas es encara a l’estat de projècte mai las causas avançan lèu ; lo primièr numèro nos a semblat important de lo consacrar a la poetica de l’espaci dins l’òbra de Robèrt Lafont que foguèt l’un dels primièrs, tre 1958, a parlar de « geopoetica ».
Aital, dobrirem doblament l’espaci de la revista a l’òme que saupèt, coma o diguèt un jorn Florian Vernet, « dubrir pòrtas e fenèstras ».

L’apèl a contribucions es disponible en linha via la pagina dels projèctes en cors del CIRDOC, qu’alberga provisòriament la revista e serà difusit largament.

D’autras tematicas de venir

Los numèros seguents seràn compausats a flor e a mesura de las contribucions recebudas e acceptadas pel comitat de redaccion après apèl mes en linha.
NB : coma dich en preambul, e mai la literatura occitana se presente coma lo còr de cada numèro, velharem a la metre en dialòg amb l’expression literària dins d’autras lengas, a començar per las lengas minorizadas de França. D’ara en la, nos podètz propausar de projèctes de contribucions en foncion de las tematicas envisatjadas.

  • Teatre d’òc. Evolucions del teatre en lenga d’òc tras los sègles, e agaches crosats amb lo teatre dins las autras lengas de França.
  • Racontes breus. Novèlas. Quina plaça per la pròsa corta en òc e dins las lengas de França ?
  • Lo conte en occitan, eiretatges e transformacions d’una fòrma populara.
  • Literatura feminina d’òc.
  • A l’entorn de la revista Òc : un luòc essencial per la creacion occitana.
  • Jòrgi Gròs e lo conte de creacion en occitan.
  • Bernard Lesfargas, un percors poetic, militant, editorial.
  • Actualitat de l’expression poetica, las votzes occitanas d’ara. Actualitat de la creacion poetica dins las autras lengas dichas « minorizadas » ?
  • La difusion de la literatura en lengas dichas « minorizadas » : editors, revistas, mercats del libre, festenals, mesa en musica dels tèxtes, mesa en scèna…
  • La cançon occitana d’uèi, coma « òbra literària » ?
  • Tornar legir Joan Bodon al sègle XXI.
  • Una geopoetica occitana ? Seguida de la reflexion entamenada sus Robèrt Lafont dins lo primièr numèro, alargada a d’autres autors.
  • Cançon populara e creacion poetica (Paulin, Allan, Pecout, Espieut…)
  • D’una lenga a l’autra : la revirada de l’occitan o en occitan.
  • L’occitan dins lo concèrt de las lengas, una escritura multi-lenga ?
  • Escriure darrièr las parets, la literatura carcerala en òc e dins las autras lengas.

Se vos interèssa lo projècte

Totas remarcas, criticas, proposicions de collaboration son de mandar al conselh de direccion :
yan.Lespoux@univ-montp3.fr, marie-jeanne.verny@univ-montp3.fr, sylvan.chabaud@univ-montp3.fr
Responsable editorial : lo director-conservator del CIRDOC.

Lo comitat de redaccion es en cors de constitucion. Sovetam que siá compausat

  • De cercaires en domèni occitan, en França e a l’internacional
  • De cercaires dins las autras lengas de França
  • De cercaires dins los domènis linguistics de nòstre laboratòri de restacament LLACS-ReSo.

Aquel comitat de redaccion serà de segur associat a l’avaloracion de las contribucions recebudas e a la definicion dels conten guts.
Nos podètz prepausar vòstra collaboracion per aquò, e/o nos senhalar de personas susceptiblas de portar pèira al projècte


Appel à contributions pour le premier numéro de la revue Plumas : Poétique de l’espace dans l’œuvre de Robert Lafont.

TwitterFacebookLinkedInPinterestTumblrEmail