Partenariat entre lo CIRDÒC e la Bibliotèca de Tolosa per la numerizacion del patrimòni literari occitan

Dempuèi 2011 lo CIRDÒC es cargat per las collectivitats publicas d’assegurar un programa larg de numerizacion del patrimòni escrit occitan, amb lo sosten del Ministèri de la Cultura, la Bibliotèca nacionala de França, las Regions Occitània / Pirenèus-Mediterranèa e Novèla-Aquitània e mai Euròpa (Fonzes FEDER Occitània).

Aprèp aver fach l’inventari de pròche de 200 establiments (bibliotècas, archius, universitats, musèus, societat sabentas e associacions culturalas) que consèrvan de fonzes documentaris en occitan, lo CIRDÒC coopèra amb los establiments volontaris per fin de seleccionar, numerizar e metre en linha sus Occitanica (www.occitanica.eu), Gallica (http://gallica.bnf.fr) e Europeana (https://www.europeana.eu) l’escrit occitan de l’Edat Mejana fins a uèi.

Un acòrdi novèl de cooperacion amb la Vila de Tolosa pel periòde 2016-2019 :

Aprèp un primièr partenariat en 2012 amb la Vila de Tolosa e la Bibliotèca d’estudis e del patrimòni que permetèt de numerizar e de metre a la disposicion del public en linha un centenat d’imprimits occitans ancians e rares, lo CIRDÒC e la Bibliotèca de Tolosa venon de signar un acòrdi novèl de cooperacion per la numerizacion e la mesa en linha de mantuna revista literària importanta a l’encòp per la coneissença e la practica de l’occitan e tanben per la mesa en valor del patrimòni tolosenc.

Objectius de la cooperacion : mesa en ret dels establiments e desvolopament de las donadas e ressorsas occitanas en accès liure sus Internet

  • melhorar la coneissença de la documentacion occitana : inventari e senhalament dels fonzes, escambi de donadas per enriquir los catalògs e portals en linha ;
  • numerizar, presentar e difusar en linha de documents qu’interèssan la recèrca, l’ensenhament e mai la practica de la lenga pel desvolopament de l’escrit literari occitan disponible en linha ;
  • metre en òbra d’accions e de projèctes de valorizacion del patrimòni cultural occitan a destinacion dels diferents publics.

Dins lo quadre de la politica de cooperacion amb los establiments documentaris, lo CIRDÒC e la Bibliotèca de Tolosa asseguran amassa l’enquadrament tecnic e scientific del projècte e lo CIRDÒC assegura l’administracion e lo finançament de las accions de numerizacion.

Ja en linha : la revista Lo Gai Saber numerizada

Creada en 1919 a Tolosa a l’entorn de « l’Escòla occitana » que regropava una generacion novèla d’intellectuals e d’escrivans occitans renovators de la lenga e de la literatura occitanas, la revista Lo Gai Saber figura amb Oc e Reclams mentre las tres grandas revistas d’idèas e de creacion qu’an marcada la modernitat occitana e que pareisson totjorn a l’ora d’ara.
La numerizacion del Gai Saber permetrà de rendre accessibles a totas e a totes de milièrs de tèxtes literaris, de debat, de pensada en occitan signats per las grandas personalitats occitanas del sègle XXI.
Mercés a l’autorizacion donada per l’editor de la revista e d’unes autors sollicitats, la revista serà progressivament mesa en linha dempuèi l’origina fins a las annadas 2000.

Veire las primièras serias en linha sus Occitanica : aqui

TwitterFacebookLinkedInPinterestTumblrEmail