Novèl catalòg general de las colleccions del CIRDÒC

En aquesta fin d’annada 2017, la basa Mediatèca, catalòg general de las colleccions del CIRDÒC, se renovèla per tal de vos propausar un servici totjorn mai qualitatiu e convivial.

Un logicial open source en acòrdi amb las valors del CIRDÒC

Un SIGB es un logicial de gestion de las activitats necessàrias al foncionament d’una bibliotèca. L’evolucion de las activitats del CIRDÒC l’a menat a metre en plaça un sistèma de gestion informatic novèl que respond al desvolopament de sos besonhs. La causida s’es portada sul logicial liure Koha. Son definits coma liures los logicials que lor còdi sorsa pòt èsser modificat e melhorat per la comunautat segon sos besonhs. Darrièr aqueles critèris se perfila tota una filosofia de cooperacion e de reflexion a l’entorn de l’accès a la coneissença coma ben public : filosofia partejada pel CIRDÒC.

L’istòria de Koha
Nascut de l’iniciativa de quatre bibliotècas neozelandesas, aquel logicial es estat desvolopat per respondre a las fòrtas inquietuds quant a la pèrda de lors donadas al moment del passatge informatic a l’an 2000. Koha es una solucion implantada dins mantuna bibliotèca pel mond que benefícia d’una comunautat nombrosa e activa, compausada de bibliotecaris e d’informaticians que lor objectiu es de perfeccionar totjorn mai lo logicial. En maori, koha significa lo don, Koha pòrta plan son nom puèi qu’efectivament es botat jos licéncia liura.

Una interfàcia professionala enriquida

Lo logicial a permés de desvolopar los moduls seguents per tal de respondre als besonhs dels bibliotecaris del CIRDÒC :

  • Seguit de las aquisicions ;
  • Catalogatge e bulletinatge (estat de colleccion dels periodics del CIRDÒC) ;
  • Inscripcion dels lectors ;
  • Circulacion (manlèu/retorn) ;
  • Ajuda en linha ;
  • Bilances e estatisticas ;
  • Edicion d’anóncias visiblas sus l’interfàcia utilizaire ;
  • Lo parametratge de l’aplicacion per l’administrator a partir de l’interfàcia professionala (tipes de documents, règlas de manlèu, categorias de lectors…).

Ne saber + sus las foncionalitats professionalas de Koha : http://koha-fr.org/linterface-professionnelle/

Una gestion multi-sites del catalòg

Koha permet tanben als partenaris del CIRDÒC d’utilizar son catalòg per referenciar lors colleccions.
A l’ora d’ara tres estructuras partenàrias utilizan lo catalòg del CIRDÒC : l’IEO del Lemosin, lo CFPO Miègjorn-Pirenèas e la bibliotèca Joseph Vaylet d’Espaliu.
Sètz una bibliotèca interessada pel projècte ? Nos podètz contactar a l’adreiça seguenta : secretariat@cirdoc.fr

Mai de servicis per los utilizaires de la Mediatèca occitana

L’utilizacion de Koha a tanben permés de desvolopar un OPAC (Online Public Access Catalog), interfàcia accessibla al public, mai intuitiva. Al delà d’una presentacion repensada, l’interfàcia del catalòg facilita las recèrcas documentàrias (libres, revistas, articles, CD, DVD…) e propausa de novèlas foncionalitats.

Accessible dempuèi un ordenador connectat, en çò vòstre o a la mediatèca del CIRDÒC, podètz d’ara enlà :

  • enregistrar vòstres resultats de recèrca dins de tièras conservadas en memòria ;
  • exportar vòstras tièras de notícias per las integrar dins un logicial de referéncias bibliograficas (aquí Zotero e EndNote) : fòrça pratic pels estudiants ;
  • gerir vòstre compte personal ;
  • reservar de documents ;
  • consultar l’estat de vòstres manlèus e son istoric ;
  • suggerir d’aquisicions novèlas.

Descobrissètz lo novèl catalòg : aqui.

L’evolucion del sistèma de gestion del catalòg del CIRDÒC s’inscriu dins lo programa “Occitanica+”

logos occitanica europe s'engage union europenne région occitanie
TwitterFacebookLinkedInPinterestTumblrEmail