
Un projècte del pòl Publics & Cooperacion.
Dins l’encastre de la tematica Occitan : lenga viva, lenga del viu – La botanica e la transmission dels sabers, lo CIRDÒC – Institut occitan de cultura s’associèt amb l’agença creativa OKIDOKID (31) per crear un erbièr de fuèlhas subrebèl, tot en occitan.
Subrebèl… e plan practic !
Lo tèxte d’aquela version en occitan lengadocian foguèt adaptat per l’etnobotanista Josiana Ubaud. Siloètas, fruchas, caracteristicas… 15 arbres de descobrir al fial de las paginas, cconcebudas per abrigar e conservar los tresaurs de fuèlhas collectadas amb grand suènh dins la natura per pichons e bèls :
“Se t’agrada d’acampar de fuèlhas en te passejant pels bòsques e vergièrs, vaquí un primièr erbièr natura per i estremar tas tròbas mai bèlas !
Fichas de completar, conselhs tecnics, informacions de bon reténer… Un obratge practic e personalizable per anar a l’encontre de quinze arbres – e mai – de nòstres terraires.”




En acompanhament de la mòstra Lenga viva, lenga del viu, que nos mena a la descobèrta dels erbièrs mas tanben dels mila usatges de las plantas fachas per las societats umanas d’ièr e d’ara, d’exemplars de Mon primièr erbièr de fuèlhas son propausats als partenaris ensenhaires, animators e mediators del patrimòni dins l’encastre de projèctes d’educacion artistica e culturala tant coma de projèctes pedagogics transdisciplinaris, que crosan l’educacion al desvolopament duradís, las SVT, la literatura, las arts plasticas, la musica…
Interessats ? Lo pòl Patrimòni & Sabers e la compausanta accion educativa del pòl Publics & Cooperacion vos acompanhan per espleitar aquestes supòrts e bastir aquestes projèctes.
Ne saber mai : prod-edu@oc-cultura.eu
“Que, chau lo veire, l’aubre, en sa fuelha, sas flors e sos fruchs”
Marcela Delpastre








