LIVHES, Living heritage for sustainable development

Lo CIRDÒC-Institut occitan de cultura partenari deu projècte LIVHES

Lo CIRDÒC – Institut occitan de Cultura, qu’ei un deus nau partenaris deu projècte : LIVHES, Living heritage for sustainable development, sostiengut per l’Union Europèa dens l’encastre deu hons INTERREG V-B SUDÒE.

Lo projècte LIVHES que respon a un besonh europèu e a un desfís territoriau partatjat per las zònas chic pobladas deu sud d’Euròpa : trobar e hicar en òbra formulas navèras entà valorizar lo lor important patrimòni culturau immateriau (PCI), dont ua partida ei promovuda e reconeguda per l’UNÈSCO, com utís de desvolopament economic durable e de coesion territoriau.
Lo projècte qu’amassa nau territòris : Pôle Métropolitain Pays de Béarn, Diputación Provincial de Teruel, Diputación de Burgos, Fundació Institut Català de Recerca en Patrimoni Cultural, Municipio de Barcelos, Universidad Pública de Navarra, CIRDÒC – Institut occitan de Cultura, Communauté de communes Pyrénées Haut-Garonnaises, Agrupamento Europeu de cooperação territorial Do Rio Minho.
Entà tiéner aqueth desfís, las nau entitats partenàrias de las ueit regions SUDÒE (Pirenèus Atlantics – Navèra Aquitània, Pirenèus Nauts Garonés – Occitània, Catalonha, Navarra, Teruel, Burgos, Region transfronterèra de Rio Minho, Barcelos) qu’an bastit un projècte de cooperacion.

Aquera collaboracion que permeterà :
– d’identificar e d’estudiar las mei bonas practicas a l’entorn de la valorizacion deu PCI com motor deu desvolopament locau e de la coesion territoriau ;
– de desvolopar ua metodologia comuna entà la valorizacion deu PCI e ua strategia adaptada a cada region qui participa, qui intègre las mei bonas practicas e qui respónia aus problèmas detectats ;
– d’experimentar la metodologia prepausada per ueit « experiéncias pilòte » qui combinan lo desvolopament durable dab la valorizacion deu PCI. Un modèle tipe que serà atau definit e difusat suu territòri de SUDÒE per la creacion d’un hialat e la mesa en òbra d’un plan de tribalh.

Lo projècte qu’a començat lo prumèr de noveme 2020 e que’s fenirà lo 30 d’abriu 2023.

TwitterFacebookLinkedInPinterestTumblrEmail