La formacion annau au patrimòni culturau immateriau be’s harà !

Formacion_PCI

Lo Laboratòri ITEM de l’UPPA, lo CIRDOC – Institut Occitan de Cultura – Etnopòle occitan e la Direccion generau deus patrimònis deu Ministèri de la Cultura e de la Comunicacion, qu’organizan dias de formacion suu Patrimòni culturau immateriau.

Viu e contemporanèu lo Patrimòni Culturau Immateriau (PCI) que tien, segon la convencion de l’UNÈSCO qui l’ei dedicada (2003), las practicas, representacions, expressions, coneishenças e saber-har – atau com los instruments, objèctes, artefactes e espacis culturaus qui’us son associats – que las comunautats, los grops e, a còps tanben, los individús e reconeishen com hant part deu lor patrimòni culturau. Aqueth patrimòni culturau immateriau, transmetut d’ua generacion tà l’auta, qu’ei tornat crear a contunhar per las comunautats e los grops en foncion deu lor demiei, de la lor interaccion dab la natura e de la lor istòria, e que’us balha un sentiment d’identitat e de continuèr, qui contribueish atau a promòver lo respècte de la diversitat culturau e la creativitat umana.

Deus arcanes de l’UNÈSCO e deu Ministèri de la Cultura dinc a l’enquista de terrenh ; de la redaccion de fichas d’inventari dinc a l’elaboracion d’un dossièr de labellizacion ; de la realizacion d’archius bruts dinc a la lor valorizacion mercés aus apèrs numerics (sites, hialats sociaus) ; aquera formacion qu’abordarà las questions d’inventari e de sauvaguarda deu PCI tant tà çò de la teoria com de la practica. Lo patrimòni culturau immateriau qui apèra ua expertesa partatjada enter practicaires, cercaires e institucions patrimoniaus, Aquera coconstruccion que’s questionarà tà çò de las consequéncias sanitàrias d’aqueste an en apressant lo « PCI empachat » qui serà totun lo terrenh viu d’experimentacion d’aquera setmana de formacion.

Que’s harà a Pau, deu 22 au 26 de heurèr 2021.

La formacion en presenciau qu’ei reservada aus estudiants de l’UPPA, totun que s’i pòt assistir aus dias deu diluns e deu dimèrcs per visioconferéncia en seguir aqueste ligam Zoom : https://us02web.zoom.us/j/2793731833?pwd=cFpEVDJFdXFHcWFYc1RNb3hpb0R6UT09
ID de l’amassada : 279 373 1833
Còdi secret : 1234

Tà’n saber mei, que’ns podetz contactar ací : mt.martin@oc-cultura.eu

TwitterFacebookLinkedInPinterestTumblrEmail