La Ciutat creativa de la cultura bearnesa

L’Etnopòle occitan deu CIRDOC – Institut occitan de cultura installat despuish 20 ans a Vilhèra, que muda a l’abòr de cap a Pau ! Que s’installa au còr istoric de la villa, a la Ciutat – Ciutat creativa de la cultura bearnesa. Aquesta installacion que s’acompanha de la creacion de navèths servicis e equipament publics peu noste establiment.

Qu’i poiratz descobrir :

  • un salon de lectura e descobèrta ;

  • un espaci de tribalh peus cercaires ;

  • un espaci dedicat a la lenga ;

  • espacis de mediacions qui arcuelheràn mustras e talhèrs de practicas culturalas.

L’establiment qu’ei membre fondator deu projècte qui’s situa au barri deu Hedàs (Plaça Recaborde) portat per l’Associacion de Prefiguracion de la Ciutat. Aqueth endret qu’aplegarà un sarròt d’actors màgers deu territòri entà crear sinergia de projèctes ligats a la cultura nosta. En mei deus dipositius hicat en plaça peu CIRDOC – Institut occitan de cultura, d’autes actors que desvolòpan d’autes projèctes com per exemple un centre de creacion artistic, un espaci ligat a la gastronomia, ua libreria o enqüèra espacis de transmission de la dança.

Si los permèrs bastiments liurats que son los deu pòle educatiu ubèrt en seteme, lo noste establiment que’s mudarà au briu d’octobre. Que s’enseguirà l’installacion deus navèths equipaments e d’autas estructuras. Lo liurament deus darrèrs bastiments qu’ei previst a la prima de 2022.

La nosta equipa que serà encantada de’vs póder arcuélher entà arrespóner au mei plan a vòstas espèras.

TwitterFacebookLinkedInPinterestTumblrEmail