La Canso de Sancta Fides – Projècte de recreacion artistica a l’entorn d’un tèxte occitan emblematic

La Canso de Sancta Fides constituís un dels tèxtes occitans mai ancians conegut a l’ora d’ara. Datat de la segonda mitat del sègle XI, rapòrta la vida e lo martir de Sancta Fides de Concas, jos la forma de quaranta coblets de laissas monorimas.

Una composicion qu’es malurosament pervenguda sens notacion musicala e que l’artista Brice Duisit li desira tornar sa foncion primièra, la d’èsser cantada per un public.

Presentacion del projècte :

Brice Duisit benefícia per menar a sa fin aquela òbra de recreacion, de quatre sessions de trabalh alprèp del Centre Internacional de Musicas Medievalas de la davalada de 2017 a la prima de 2018. Una residéncia artistica que s’acabarà al mes de mai de 2018 a l’escasença d’un concèrt public.

« Lo jornal de la creacion » – Seguir l’artista al fial de sas cèrcas

Cinq rendètz-vos (un seminari marcarà lo primièr temps de residéncia) pendent los quals l’artista escambiarà amb los escolans de l’Universitat de Montpelhièr, e que donaràn luòc a un « Jornal de la creacion », portat mercés al partenariat nosat entre lo Centre International de Musicas Medievalas (CIMM ) e lo CIRDÒC. Aquel jornal, un documentari audiovisual nascut de las entrevistas e dels rencontres entre los estudiants e B.Duisit a cada temps de la residéncia, serà difusat en linha a la fin del projècte, dins l’encastre d’Occitanica.eu. Permetrà de seguir pas a pas, als costats de l’artista, l’exigent trabalh de recèrca menat per rendre a la Canso de Sancta Fides sa foncion primièra d’òbra destinada a èsser cantada.

Lo projècte en qualques datas :

Del 13 al 16 de novembre de 2017 : primièr temps de residéncia

16 de novembre de 2017 : « La Chanson de sainte Foy de Conques et autres chants occitans : processus de restitution » – Seminari CEMM

Del 12 al 14 de febrièr de 2018 : segon temps de residéncia

Del 12 al 14 de març de 2018 : tresen temps de residéncia

Del 7 al 9 d’abril de 2018 : quatren temps de residéncia

26 de mai de 2018 : concèrt de restitucion a Sant Guilhèm dau Desèrt

Brice Duisit

Lautista de formacion, seguís los corses del Conservatòri Nacional de Musica de Pau. Passionat de las musicas medievalas, se perfecciona al CNSM de Lion en paleografia musicala e dins la practica del contrapunt dels sègles 12 e 13. Son interès creissent per l’epòca romana (sègles 11-12) lo mena a abordar lo repertòri de las poesias liricas e a s’iniciar a la vièla d’arquet. S’enseguís tota una recèrca sus las primièras poesias en lengas romanas e desvolopa una interpretacion de tria basada sul rapòrt del tèxte a la musica, de l’instrument a la votz, del compositor a l’interprèta…

Dempuèi 2001, Brice Duisit dirigís regularament de formacions pels musicaires medievistas professionals e de programas de recèrcas sus l’interpretacion de repertòris romans de lenga occitana en participant a d’enregistraments regularament premiats per la prensa internacionala especializada.

Lo CIMM – Centre International de Musicas Medievalas

Fondat sus la sinergia entre cercaires, archeo-lautistas e escolans, lo Centre Internacional de Musicas Medievalas – Du ciel aux marges (CIMM) promòu la creacion, la difusion e la transmission de las musicas medievalas per la presa en compta, l’apòrt de la recèrca musicologica e los enjòcs contemporanèus de l’espectacle viu. Nascut en setembre de 2014 de las òbras de valorizacion del Centre d’Estudis Medievals de Montpelhièr (CEMM EA 4583), lo CIMM es convencionat amb l’Universitat Paul-Valéry Montpelhièr 3 e lo Conservatòri a Raionament Regional de Montpelhièr Mediterranèa Metropòli.

TwitterFacebookLinkedInPinterestTumblrEmail