Formacion au patrimòni culturau immateriau 2022 : « PCI : patrimòni vivent »

Lo CIRDOC – Institut Occitan de Cultura – Etnopòle occitan, lo Laboratòri ITEM de l’UPPA, e la Direccion generau deus patrimònis deu Ministèri de la Cultura e de la Comunicacion, qu’organizan dias de formacion suu Patrimòni culturau immateriau deu 14 au 18 de heurèr.

 

Viu e contemporanèu lo Patrimòni Culturau Immateriau (PCI) que tien, segon la convencion de l’UNÈSCO qui l’ei dedicada (2003), las practicas, representacions, expressions, coneishenças e saber-har – atau com los instruments, objèctes, artefactes e espacis culturaus qui’us son associats – que las comunautats, los grops e, a còps tanben, los individús e reconeishen com hant part deu lor patrimòni culturau. Aqueth patrimòni culturau immateriau, transmetut d’ua generacion tà l’auta, qu’ei tornat crear a contunhar per las comunautats e los grops en foncion deu lor demiei, de la lor interaccion dab la natura e de la lor istòria, e que’us balha un sentiment d’identitat e de continuèr, qui contribueish atau a promòver lo respècte de la diversitat culturau e la creativitat umana.

 

Deus arcanes de l’UNÈSCO e deu Ministèri de la Cultura dinc a l’enquista de terrenh ; de la redaccion de fichas d’inventari dinc a l’elaboracion d’un dossièr de labellizacion ; de la realizacion d’archius bruts dinc a la lor valorizacion mercés aus apèrs numerics (sites, hialats sociaus) ; aquera formacion qu’abordarà las questions d’inventari e de sauvaguarda deu PCI tant tà çò de la teoria com de la practica.

 

Lo patrimòni culturau immateriau qui apèra ua expertesa partatjada enter practicaires, cercaires e institucions patrimoniaus, aquera coconstruccion que s’installara a la Ciutat, tèrç lòc de la ciutat creativa de la cultura bearnes a Pau qui constituirà, augan, lo terrenh viu d’experimentacion d’aquera setmana de formacion.

 

Entresenha au près de Rémy Berdou : r.berdou@oc-cultura.eu

 

TwitterFacebookLinkedInPinterestTumblrEmail