Talhièrs de cinèma Passaires d’imatges a l’entorn dels filmes de Michel Cans amb Laurence Kirsch

Un projècte del Pòle Patrimòni e Sabers e del Pòle Publics e Cooperacion

#EAC #valorizacion #archius

Dins l’encastre del dispositiu Passeurs d’images finançat per la DRAC Occitània,  la documentarista Laurence Kirsch (Gens de Thau, Sylvaine, Emma…), l’ostal de produccion Docs aux sels e lo Centre d’Acuèlh dels Demandaires d’Asile (CADA) de Besièrs collabòran amb lo departament Filmotèca del  CIRDÒC – Institut occitan de cultura per propausar de talhièrs audiovisuals que posan dins los filmes del fons Michel Cans conservats dins sas colleccions.

Lo CIRDÒC – Institut occitan de cultura aculhís aital sus son site de la Mediatèca los talhièrs que recampan un grop de 5 enfants del CADA de Besièrs de 5 a 11 ans, enquadrats per Laurence Kirsch. Per dos jorns de l’estiu 2021, los joves an visionat puèi utilizat una seleccion de filmes del fons Cans per crear lor sieu filme.

Aquestes filmes d’archius, virats a Besièrs dins las annadas 1950, lor balhèron un autre agach sus la vila qu’i demòran. Los enfants se sont preses al jòcs de la sonorizacion de tròces muts en negre e blanc. Se son tanben amusats a retrobar d’endreches o de bastiments coneguts de la vila. L’autor e linguista Florian Vernet, Besierenc dempuèi l’enfància, venguèt testimoniar de l’epòca alprèp dels joves.

Los talhièrs se perseguisson cap a la fin de l’annada de 2021 amb l’amira pels participants de realizar e projectar en public un filme. Una novèla ocasion pel CIRDÒC – Institut occitan de cultura de faire conéisser sos tresaurs patrimonials e de favorizar l’accès de totes a la creacion artistica.

TwitterFacebookLinkedInPinterestTumblrEmail