Mercés al sosten del Ministèri de la Cultura, lo CIRDÒC – Institut occitan de cultura s’assòcia amb l’orquèstra barròc de Montalban Les Passions per un projècte de valorizacion dels bèls de l’opèra en occitan mai conegut : Dafnís e Alcimadura del Narbonés Jean-Joseph Cassanéa de Mondonville. Un projècte labelizat “400 ans Jean de La Fontaine”.
Per ne saber mai sus Dafnís e Alcimadura :
De fach, la produccion per l’ensemble Les Passions – Orquèstre barròc de Montalban, jos la direccion de Jean-Marc Andrieu, de l’opèra pastoral en occitan Dafnís e Alcimadura de Mondonville (representacions a la davalada de 2021) balha al CIRDÒC – Institut occitan de cultura una oportunitat unenca d’anar al rencontre de publics novèls, notadament escolars, en tot metre en lutz son còrpus de particions estampadas e manuscritas, entre las qualas una edicion de 1754 de la particion de Dafnís e Alcimadura, en metent en òbra un programa de valorizacion long de l’annada 2020-2021.
Un programa que concorda en 2021 amb la commemoracion dels 400 ans de la naissença de Jean de La Fontaine, autor de la faula adaptada per Mondonville dins son opèra.
Vòstres rendètz-vos
Lo CIRDÒC – Institut occitan de cultura e sos partenaris vos balhan rendètz-vos long de l’annada 2021, al fial d’aquel programa de descobèrta que vos propausarà, entre autres :
- d’accions d’educacion artistica e culturala al dintre de 3 collègis (en seguida d’un apèl a interés) del 1èr al 4 de març, jos la fòrma d’intervencions escolaras animadas per Les Passions e l’elaboracion amb los ensenhaires d’un projècte transdisciplinari a l’entorn de l’òbra, en partenariat amb lo Conservatòri Besièrs Mediterranèa) ;
- una restitucion publica jos la direccion de Jean-Marc Andrieu (captacion a pòrta tancada lo 2 de març, difusida après còp en rason dels protòcols sanitaris) en partenariat amb lo Teatre municipal e lo Conservatòri Besièrs Mediterranèa del trabalh menat amb Les Passions, jos la fòrma d’una conferéncia musicala en abans-primièra de las representacions, dins lo decòr majestuós del teatre a l’italiana mes a disposicion per la Vila de Besièrs ;
- la concepcion pel pòl Patrimòni & Sabers del Centre d’una mòstra mobila, en declinason del dispositiu de mediacion «Mila ans de cultura», de descobrir per 2021 ;
- la creacion d’un libret de mediacion, que se poirà espleitar en classa e qu’acompanharà la mòstra ;
- la realizacion d’un filme de 26 minutas que documentarà, en partissent de la particion escrita, lo jornal de la recreacion per Les Passions.
Còp d’aviada : Per una setmana (1-5 de març de 2021) dedicada als rencontres amb los collegians e la presentacion publica, en abans-primièra, del trabalh menat, lo CIRDÒC – Institut occitan de cultura accueillís a Besièrs, sus son site Mediatèca, 5 artistas de l’orquèstre barròc de Montalban Les Passions, de renomada internacionala, jos la direccion de Jean-Marc Andrieu : Flavio Losco (violon), Etienne Mangot (violoncèla), Yvan Garcia (clavecin), Muriel Batbie-Castell e François-Nicolas Geslot (cant liric).
Contacte : prod-edu[a]oc-cultura.eu
Los objectius
Aquela collaboracion de nòstra institucion culturala e patrimoniala e d’un partenari artistic s’es donada per tòcas de :
- aprigondir l’estudi e la coneissença del còrpus de particions estampadas e manuscritas del CIRDÒC – Institut occitan de cultura ;
- assegurar una mediacion necessària de l’òbra, mal coneguda, e sa mesa en contèxte alprèp del public de la musica lirica, notadament per las representacions sus las scènas nacionalas ;
- provocar lo rencontre del jove public amb aquel opèra e los artistas de l’ensemble barròc, en tot elaborar amb los ensenhaires los otisses pedagogics per acompanhar aquesta descobèrta ;
- documentar aquesta incarnacion novèla de l’òbra al sègle XXI, de l’adaptacion del libret fins a la representacion publica.
