Visitar lo CIRDÒC – Institut occitan de cultura

Lo CIRDÒC – Institut occitan de cultura vos aculhís dins sos dos sites (Mediatèca a Besièrs e Etnopòle a Vilhèra) per descobrir l’institucion, sas colleccions e sos mestièrs.
Las visitas son organizadas sus rendètz-vos e s’adaptan als vòstres centres d’interès. Pòdon èsser acompanhadas de rencontres artistics o culturals, d’activitats educativas o d’accions de formacion pels grops de professionals.

Las visitas e activitats son disponiblas en occitan e en francés (autras lengas possiblas sus demanda).

Associacions, grops d’adultes

Dins l’encastre de sas activitats associativas, per descobrir o practicar la lenga e la cultura occitanas, los agents del CIRDÒC – Institut occitan de cultura vos aculhisson e adaptan lor programa d’activitat als vòstres centres d’interès.

Visitas e activitats a la Mediatèca occitana (site de Besièrs)

• A la descobèrta del patrimòni occitan

Descobrissètz la riquesa e la diversitat del patrimòni occitan per un camin dins las colleccions patrimonialas e los espacis de la Mediatèca del CIRDÒC – Institut occitan de cultura (site de Besièrs) : visita de las resèrvas patrimonialas e descobèrta dels tresaurs de la colleccion ; descobèrta de l’actualitat de la lenga e de la cultura occitanas.
10 a 20 personas (30 max.) ; durada 1h

Activitats complementàrias ; durada 45 min.

• • Kit de Primièrs secorses en occitan : coneissenças de basa e iniciacion a la lenga occitana
  • Conferéncia-projeccion « 1000 ans de cultura : a la descobèrta del patrimòni occitan »
  • Conferéncia musicala : riquesa e diversitat de las musicas occitanas
  • Visitas e activitats tematicas possiblas a la demanda sus un periòde, una personalitat, un tèma particular.

• Riquesa e diversitat de la creacion occitana actuala

La Mediatèca del CIRDÒC – Institut occitan de cultura balha accès a la totalitat de la produccion culturala actuala en occitan. Representa tant pels profesionals de la cultura coma pels curioses, un supòrt formidable per conéisser la realitat e la diversitat de la creacion actuala en occitan.

• • classics e caps d’òbra literaris
  • escrivanas e escrivans d’ara
  • musica e audiovisual
  • libres e produccions jove public

10 a 20 personas (30 max.) ; durada 1h

Activitats complementàrias :

• • Kit de Primièrs secorses occitans : coneissenças de basa e iniciacion a la lenga occitana
  • Descobèrta de las aisinas e ressorsas numericas per aprene e practicar l’occitan
  • Descobèrta de las ressorsas educativas e jove public

Organizar vòstra visita : Nos contactar

Visitas e activitats a l’Etnopòle (site de Vilhèra)

• A la descobèrta del patrimòni cultural immaterial occitan

La Convencion de l’UNÈSCO de 2003 e, en França, lo Còdi del Patrimòni definisson una categoria patrimoniala novèla : lo patrimòni cultural immaterial (PCI). Labelizat « etnopòle » pel Ministèri de la Cultura, lo CIRDÒC – Institut occitan de cultura es un dels actors institucionals cargat de la mesa en òbra d’aqueste apròchi patrimonial novèl pel domeni occitan. Aquesta visita tematica, que se pòt adaptar segon vòstres centres d’interès, vos propausa un camin pels diferents elements del PCI occitan, plan vius e en renovèlament perpetual.

Visitas e accions escolaras

La Mediatèca del CIRDÒC – Institut occitan de cultura vos aculhís per de jornadas o mièjas jornadas tematicas. Concebudas en cooperacion amb los ensenhaires e las ensenhairas, las visitas escolaras son acompanhadas de talhièrs lenga, cultura e/o espòrt.
L’acuèlh de grop per de visitas guidadas tematicas e talhièrs de sensibilizacion culturala pel jove public pòt èsser tanben organizat dins l’encastre de vòstras animacions peri- o extra-escolaras, trantalhetz pas a nos contactar.

• Visita guidada de la Mediatèca, de las mòstras temporàrias, descobèrta de las colleccions e de las aisinas numericas desvolopadas pel Centre : Occitanica e sas compausantas. (Totes nivèls)
• Pels liceans, descobèrta tematica « los mestièrs de l’occitan » : escambi amb los professionals del CIRDÒC – Institut occitan de cultura a l’entorn de lors trajèctes e missions.
• Per las mairalas e primàrias, possibilitat d’organizar de rendètz-vos regulars a la « Pichonetèca » (espaci pels pichons) per legir e manlevar una seleccion d’obratges, escambiar amb una bibliotecària e escotar de kamishibaï.

La visita es acompanhada d’un o mantun talhièr de sensibilizacion culturala que podètz causir (jos resèrva de disponibilitat de lors responsables lo jorn de vòstra visita).
Comptar per cada talhièr al mens 45 minutas per grop de 15 escolans max. doncas minimum 1h30 sus plaça per un grop de 30 escolans.

Preparar sa visita / Catalòg dels talhièrs