Situada al còr de Besièrs dins lo barri cultural e universitari del Camp de Març (plaça del 14-Juillet), la Mediatèca del CIRDÒC – Institut occitan de cultura s’adreça a totes los publics.
Propausa, en accès liure, de colleccions e de ressorsas culturalas, d’equipaments e d’activitats a destinacion de totes los publics que vòlon descobrir, estudiar o tot simplament practicar la lenga e la cultura occitanas.
La Mediatèca es tanben una aisina de ressorsas e de servicis pels publics professionals, las associacions, las collectivitats, las entrepresas, que, dins l’encastre de lors activitats, lors projèctes o lor formacion personala, an de besonhs d’informacion, de documentacion, de ressorsas, de conselh o d’acompanhament.
Accès e oraris : Mediatèca (Besièrs) – Informacions practicas
Los espacis e las colleccions
Al planpè, la Mediatèca vos propausa en accès liure per la descobèrta, la consultacion sus plaça, lo prèst a domicili o lo prèst a las collectivitats, entrepresas e associacions la totalitat de la produccion occitana actuala : literatura, musica, teatre, joventut, audiovisual, ensenhament, patrimòni cultural, recèrca actuala, etc.
La Mediatèca constituís aital una aisina d’informacion, de documentacion e de lésers culturals pels publics occitanofòns e los apreneires de tot atge, e tanben un luòc dedicat a la descobèrta de la lenga e de la cultura occitanas per totes los publics, pas occitanofòns, amb fòrça documents e ressorsas en francés e dins diferentas lengas estrangièras.
La Lengatèca s’adreça als apreneires, als ensenhaires, formators e professionals dins los sectors de la transmission de la lenga e de la cultura occitanas.
I trobaretz :
Pels apreneires :
- totas las informacions e contactes per aprene l’occitan (escolaritat, corses per adultes, estudis universitaris, formacions professionalas) ;
- una seccion dedicada a l’autoaprendissatge (manuals, metòdes, diccionaris, aisinas per la practica lingüistica)
- una « bibliotèca de l’apreneire » amb una seleccion de libres en occitan seleccionats e classificats per nivèl de lenga : A1-A2 (debutants) e B1-B2 (intermediaris).
Pels professionals (ensenhaires, formators, animators) :
- de manuals, de documentacion e d’aisinas per l’ensenhament de la lenga occitana o l’ensenhament de las diferentas disciplinas en lenga occitana ;
- de documents generals sus la pedagogia de las lengas ;
- de ressorsas utilas per l’ensenhament e lo desvolopament de las practicas lingüisticas dins l’encastre d’activitats escolaras, de formacion, o culturalas.
Pels curioses de lengas e de culturas :
L’espaci Lengatèca propausa una seccion engatjada per la promocion de la « Bibliodiversitat » amb una seleccion :
- de nombroses libres e documents sus la situacion e los enjòcs de la diversitat lingüistica e culturala dins lo mond d’ara ;
- de documents per descobrir o s’iniciar a las diferentas lengas de França ; descobrir las culturas e literaturas en lengas de França ;
- una bibliotèca occitana internacionala que recampa las òbras literàrias e tèxtes occitans tradusits e publicats en lengas estrangièras.
Lo salon de lectura de la Mediatèca qu’aculhís notadament lo tablèu « Les Troubadours » del pintre Henri Martin es dedicat a las renaissenças literàrias occitanas que, dempuèi la creacion del Consistòri del Gai Saber en 1323 a Tolosa fins a l’abondosa vida literària actuala, daissan pas d’enriquir e de renovelar una de las mai ancianas lengas de creacion literària en Euròpa.
I trobaretz :
- tota l’edicion actuala de literatura en lenga occitana classificada per autoras e autors ;
- las revistas e l’actualitat literàrias ;
- las bendas dessenhadas e romans grafics ;
- una bibliotèca dels tèxtes de teatre e d’umor destinada notadament a las tropas professionalas e d’amators en cèrca d’òbras per jogar ;
- los libres sonòrs e tèxtes legits en occitan sus CD.
I trobaretz :
- la produccion musicala contemporanèa, de l’interpretacion de musicas ancianas als genres actuals en passar per lo fòrt ric repertòri, renovelat de contunh, de las musicas de tradicions popularas ;
- las particions, recuèlhs de cançons e metòdes musicals (notadament d’instruments regionals de tradicion populara) ;
- los DVD de filmes de ficcion e filmes d’animacion en occitan ;
- los DVD de filmes documentaris en occitan o dedicats a la cultura e als territòris occitans, tan coma de nombroses espectacles filmats ;
- l’actualitat musicala e audiovisuala occitana.
L’espaci Estudis vos propausa una bibliotèca enciclopedica d’estudi e de recèrca sus la lenga e la cultura occitanas.
Totes los camps de la coneissença son representats per una ampla causida de documents (libres, revistas, DVD) en occitan o sus l’occitan (en francés e lengas estrangièras) completats per una documentacion alargada als domenis vesins del domeni d’estudis occitans : lingüistica de las lengas romanicas, sociolingüistica de França e d’Euròpa, istòria culturala regionala, sociologia e politica de l’espaci occitan, etc.
- Seccion 000 - Enciclopedias, instruments de recèrca
- Seccion 200 - Tèxtes religioses en occitan e istòria de las religions dins l’espaci occitan
- Seccion 300 - Politica e societat : sociologia, sociolingüistica, movements socials, politicas lingüisticas, ensages politics en occitan
- Seccion 370 - Reflexions e estudis pedagogics, istòria de l’ensenhament
- Seccion 390 - Culturas de tradicion orala e populara : fèstas e practicas festivas, literatura orala
- Seccion 400 - Lingüistica, aisinas gramaticalas e lexicograficas, istòria de la lenga, estudi e filologia de las lengas romanicas
- Seccion 500 - Fauna e flòra, etnobotanica, sabers populars sus l’environament
- Seccion 600 - Saber-far : artisanat, mestièrs, pastoralisme, agricultura, viticultura, cosina
- Seccion 700 – Istòria de las arts e estudis suls domenis de la creacion en occitan, arts e civilizacion romanica, estudis sus las fòrmas, genres e evolucion de la musica, de la dança, de l’espectacle, arts e artistas contemporanèus
- Seccion 800 – Istòria literària de l’Edat Mejana fins ara, edicions criticas e scientificas de las òbras, estudis suls periòdes, movements e autors
- Seccion 900 – Istòria generala de l’espaci occitan, geografia, istòria politica, sociala e culturala dels païses occitans.
L’espaci Estudis propausa un espaci pel trabalh personal e l’estudi, amb presas electricas e accès al WiFi per vòstres equipaments personals, de pòstes informatics amb accès Internet.
Per trabalhar en grop (liceans, estudiants, associacions) podètz demandar l’accès a de salas de trabalh (sus demanda a l’acuèlh, dins lo limit de las plaças disponiblas).
La Pichonetèca, es l’espaci dels pichons, es a dire dels enfants. Installatz-vos en familha o en grops escolars jos l’arbre dels racontes per fulhetar e descobrir la rica produccion editoriala occitana cap als joves publics.
La Pichonetèca es tanben una aisina per las bibliotecàrias e los bibliotecaris, ensenhairas e ensenhaires, animatrises e animators que vòlon descobrir e/o manlevar per lors estructuras de supòrts per la joventut en occitan.
Grops escolars e centres de lésers : possibilitat d’activitats culturalas, programatz vòstra venguda sus la pagina Visitas.
En accès indirècte, la Mediatèca vos propausa tanben, per de visitas o activitats, d’autres espacis publics :
- Sala de recèrca : sala de consultacion dels fonses ancians e patrimonials. Propausa tanben una importanta bibliotèca de bibliografias e instruments de recèrca especializats per domenis e periòdes d’estudi.
- Bibliotèca Robèrt Lafont : l’auditòri de la Mediatèca aculhís la bibliotèca de l’escrivan, lingüista, òme de pensada e d’accion Robèrt Lafont (1923-2009). En defòra de las activitats evenimencialas, la sala se pòt reservar per d’activitats professionalas o evenimencialas e se pòt visitar (sus demanda a l’acuèlh).
- L’Estúdio : aqueste espaci se pòt reservar per d’activitats en grop (coworking, seminaris o acamps, visioconferéncias, formacions e activitats associativas). Propausam tanben un espaci de trabalh amb de materials e equipaments a destinacion de las associacions e professionals pel tractament del tèxte, de l’imatge e del son.
- Resèrvas : las 4 resèrvas patrimonialas situadas al segond estatge del bastiment aculhisson las colleccions patrimonialas del CIRDÒC - Institut occitan de cultura aital coma los equipaments d’archivatge numeric.
Las Resèrvas son accessiblas en visita acompanhada sus demanda.
Servicis de la Mediatèca
- acuèlh, entresenha, ajuda a la recèrca, conselh e acompanhament de projècte
- prèst de documents, de ressorsas e de supòrts d’accion culturala o educativa
- activitats culturalas, programacion evenimenciala, ofèrta de visitas pels professionals, associacions e escolars
- corses de lenga e formacions totes publics e totes nivèls
- servicis de reprografia, numerizacion, estampatge a la demanda
- accès WiFi public, brancaments per vòstres equipaments personals
- equipaments d’escota musicala e de visionatge audiovisual
- prèst de salas e de materials
- espacis de mòstras e d’activitats culturalas o educativas
- espacis de trabalh individual o en grop, salon de lectura
- espaci cafè e encontres
Modalitats pel prèst de documents
- Pels particulars
Las colleccions de la Mediatèca (fòra colleccions patrimonialas) son liurament accessiblas per la consultacion sus plaça o lo prèst a domicili. L’abonament als servicis de la Mediatèca es gratuit pels individuals sus presentacion d’una pèça d’identitat (e d’una autorizacion parentala signada pels menors de mens de 12 ans).
Telecargar l’autorizacion parentala per l’abonament d’un enfant a la Mediatèca occitana - Per las collectivitats, entrepresas e associacions
Per las collectivitats e establiments publics, associacions, establiments escolars, entrepresas, la Mediatèca fonciona coma una bibliotèca centrala de prèst : podètz manlevar de lòts de ressorsas per una durada longa a destinacion dels vòstres publics (veire pagina Adesion) aital coma de mòstras e supòrts d’animacions.
Saber tot del foncionament de la Mediatèca : Carta de la Mediatèca
Activitats culturalas e programacion evenimenciala
La Mediatèca propausa tot de long de l’annada una rica programacion d’activitats e d’eveniments de cap a totes los publics, individuals, en familha, professionals, etc.
Programacion « En familha » : Contes, jòcs, iniciacion musicala, los rendètz-vos de la Pichonetèca.
Lo Cinè-club e los cicles de projeccions « Imatges autoctòns » : archius filmats, creacions documentàrias, filmes doblats en occitan, la programacion dedicada a la descobèrta del patrimòni e de la creacion audiovisuals occitans.
Mòstras, conferéncias e collòquis : tot de long de l’annada, descobrissètz la riquesa e la diversitat del patrimòni e de la creacion en occitan gràcias als cicles de mòstras, conferéncias e collòquis.
« En Òbra », actualitat creativa : espectacles, creacions actualas e sortidas de residéncia.
Corses e activitats de lenga : la Mediatèca propausa de corses, talhièrs e formacions en lenga adaptats a totes los nivèls e totes los usatges en partenariat amb los organismes de formacion professionala, en particular lo Centre de formacion professionala occitan (CFPO – Region Occitània).
« Talhièrs » per las associacions e professionals : la Mediatèca organiza regularament de talhièrs professionals per las associacions, entrepresas e collectivitats aderentas a l’entorn de lors besonhs en competéncias e saber-far pel desvolopament d’accions en favor de l’occitan.
