Per tal de metre en òbra sas missions e programas d’accion, lo CIRDÒC – Institut occitan de cultura es compausat d’una còla professionala dins los domenis de l’administracion, de la gestion e del pilotatge de politicas publicas, de las bibliotècas e de la documentacion, de l’etnologia e del patrimòni cultural immaterial, de la mediacion culturala, de l’informatica e del desvolopament de projèctes numerics.
La còla es compausada d’emplecs permanents e fa regularament apèl a d’emplecs de mission (contractes de vacacion) dins l’encastre d’obradors e de projèctes culturals, scientifics, documentaris o tecnologics particulars. Las missions de servici public e lo foncionament general de l’establiment son assegurats per d’emplecs permanents.
Ne saber + :
Per tota candidatura, mandatz vòstre CV e una letra de motivacion a :
Sénher President,
CIRDÒC – Institut occitan de cultura
1 bis baloard Duguesclin
B.P. 180
34503 BÉZIERS Cedex
O per corrièl : administrator@oc-cultura.eu
Far un estagi al CIRDÒC – Institut occitan de cultura
Dins l’encastre de sas missions, lo CIRDÒC – Institut occitan de cultura aculhís d’escolans de l’ensenhament segondari, d’estudiants, de professionals en formacion o d’estagiaris e estagiàrias convencionats per Pôle Emploi (encastre emplec competéncias, periòde de mesa en situacion dins lo mitan professional).
Los estagis pòdon èsser :
- d’observacion e de descobèrta : d’una durada maximala de 15 jorns, an per objectiu de descobrir l’establiment, sas missions, son organizacion, sos mestièrs ;
- de formacion e professionalizacion : d’una durada minimala de 15 jorns, aqueles estagis an per tòca de permetre a l’estagiari o a l’estagiària d’aquesir de sabers e de sabers-fars professionals ligats a son domeni de formacion e/o son projècte professional.
L’establiment aculhís d’estagiaris e d’estagiàrias que desiran menar de projèctes dins sos domenis d’activitat e de competéncia, a saber :
- conservacion, tractament e valorizacion de colleccions patrimonialas, documentàrias e de ressorsas numericas ;
- produccion de contenguts e de supòrts educatius e culturals ;
- informatica e tecnologias de l’informacion aplicadas al sector de la documentacion, del patrimòni e de la creacion ;
- mediacion culturala, comunicacion, estudi e desvolopament dels publics ;
- administracion, gestion d’establiment public cultural.
Totes los estagis pòdon èsser l’objècte d’una iniciacion o d’un perfeccionament en lenga e cultura occitanas (segon nivèls e competéncias esperats per l’estagiari o l’estagiària).
Los servicis de l’establiment demòran a la disposicion de las candidatas e dels candidats estagiaris per los ajudar a identificar lo contengut de lor projècte d’estagi.
Per tota demanda d’estagi, mandatz un CV e un corrièl qu’indiquen vòstres objectius de formacion o vòstre projècte professional a l’adreça : administrator@oc-cultura.eu
Efectuar un servici civic al CIRDÒC- Institut occitan de cultura
La còla del CIRDÒC – Institut occitan de cultura es en cèrca d’un o d’una volontària per fin de l’ajudar dins d’accions d’acuèlh e de mediacion – en particulièr a destinacion dels publics joves e alunhats de la cultura occitana – tot en afortissent lo ligam social e intergeneracional.
Descobrir l’integralitat de la mission e candidatar via la plataforma ”Service civique” : Aquí
