Las representacions actualas son marcadas per las practicas tradicionalas, e contribuisson a faiçonar l’Occitània del futur. La mesa a disposicion del patrimòni a per tòca abans de tot de transmetre la coneissença al mai grand nombre e de noirir la creativitat.
Coma establiment public dedicat a la conservacion e a la valorizacion del patrimòni cultural occitan, lo CIRDÒC-Institut occitan de cultura jòga un ròtle particular dins l’accessibilitat als sabers, e se vòl un vector d’escambi entre los diferents actors del mitan.
Aital, dins aqueste encastre e dins lo de sas missions de servici public, lo CIRDÒC-Institut occitan de cultura a per politica d’obrir lo mai largament possible l’accès a las donadas que produsís, e notadament a las donadas numericas. Al-delà, organiza e contribuís a la mesa en perspectiva de las expressions e ressorsas dels diferents domenis del patrimòni : entre material e immaterial, archius e practicas contemporanèas, archius escrits e orals, institucionals e obèrts, publics o privats…
Aital, s’inscriu dins un procediment de renfortiment del ligam entre patrimòni e creacion, entre cultura e ciutadanetat, entre accès a la coneissença e socializacion.
Los projèctes del CIRDÒC-Institut occitan de cultura
Occitanica es un portal collaboratiu que permet l’accès en linha a de milierats de ressorsas numericas e numerizadas en occitan o sus l’occitan, per aprene, s’assabentar, descobrir la cultura e lo patrimòni, se formar e practicar la lenga…
Lo projècte Occitanica s’inscriu dins una politica de partatge liure e de difusion de l’informacion e dels sabers. Tan coma possible, e dins lo respècte dels dreches dels creators, los contenguts son publicats sens restriccion d’accès e de reütilizacion. Es lo cas dels contenguts que lors originals apartenon al domeni public e de la màger part de las produccions del CIRDÒC-Institut occitan de cultura, dins l’encastre de sas missions de servici public e quand s’aplican pas de restriccions qu’an per amira de garantir als creators lors dreches legitimes.
Lo CIRDÒC-Institut occitan de cultura velha a çò que l’informacion sus las condicions de reütilizacion e d’espleitacion dels contenguts presents sul site siá aisidament accessibla. Cada ressorsa conten doncas un camp « condicions de reütilizacion ».
PCILab dona accès a las practicas inventoriadas dins l’encastre de l’Inventari francés del PCI menat pel ministèri de la Cultura – Direccion generala dels patrimònis. Cada ficha de l’inventari en linha correspond a una practica o a un saber-far enregistrats a l’Inventari pel Comitat del patrimòni etnologic e immaterial. La pagina permet pasmens l’accès a un inventari obèrt sus Wikipèdia. Se volètz completar las donadas relativas a una practica, vos convidam a rejónher la comunautat Wikipèdia e, al vòstre torn, a enriquir l’enciclopèdia liura e collaborativa.
Totas las donadas presentas sus PCILab e sus Wikipèdia pòdon èsser utilizadas segon las condicions d’utilizacion presentadas sus aquestes portals respectius.
Lo CIRDÒC – Institut occitan de cultura perseguís tanben una politica d’obertura de sas donadas en contribuir dirèctament a mantuna basas de donadas nacionalas e internacionalas : Ne saber mai
La cultura occitana, una cultura collaborativa
Cossí participar ? Apropriatz-vos la vòstra cultura !
Cadun pòt contribuir a enriquir la diversitat de l’expression culturala occitana, e a faiçonar la cultura occitana del futur.
Trantalhetz pas de vos apoderar dels contenguts meses a la vòstra disposicion sus nòstras diferentas plataformas : Ressorsas numericas
Vos convidam a vos entresenhar sus las modalitats de reütilizacion d’aqueles contenguts e a reütilizar las licéncias Creative Commons per vòstras pròprias produccions.
Volètz contribuir ?
Podètz contribuir a enriquir las basas de donadas sul patrimòni occitan, per exemple en comunicar vòstres pròpris documents e produccions, o en contribuir als diferents projèctes collaboratius qu’existisson en linha.
Avètz la possibilitat de valorizar los archius occitans que tenètz -> Ne saber mai
Tot actor, public o privat, detentor o productor d’informacion, de coneissenças, de ressorsas numericas en occitan o sus la cultura occitana pòt venir partenari e contributor del projècte Occitanica.
https://occitanica.eu/
https://fabrica.occitanica.eu
Descobrissètz encara mai de projèctes collaboratius occitans
Participatz al Wikimèdia occitan (Wikipèdia, Wikidata…) pel projècte collaboratiu Wikimedi’Oc : http://wikimedioc.com/
Cadun pòt participar d’un fum de biaisses : articles Wikipèdia de redigir o de tradusir, diccionaris d’enriquir de mots novèls o d’expressions novèlas, mots d’enregistrar (per enriquir una basa de salvagarda sonòra), fotografias de prene per illustrar d’articles…
Contribuissètz al desvolopament de l’usatge de la lenga occitana dins la cartografia modèrna en Open Data amb OpenStreetMap en occitan : https://wiki.openstreetmap.org/wiki/Projet_Openstreetmap-oc
Lo projècte BaRuLa permet de far descobrir de luòcs d’interès patrimonial e cultural gràcias a una carta interactiva collaborativa : http://barula.de/
Volètz valorizar vòstre projècte collaboratiu occitan ? Contactatz-nos per l’apondre a aquesta pagina !
Lo CIRDÒC-Institut occitan de cultura met tanben a disposicion fòrça ressorsas (libres, CD, DVD, documents ancians…) accessiblas sus sos dos sites fisics, la Mediatèca a Besièrs e a l’Etnopòle a Vilhèra
