Lo patrimòni occitan aquò es plan segur de manuscrits, de libres, de particions, de disques ; mas es tanben las correspondéncias, los enregistraments sonòrs amators, las fotografias o filmes de familha, las afichas de concèrt, los papierons reivindicatius, que fan encara a l’ora d’ara nòstre quotidian.
Las colleccions del CIRDÒC-Institut occitan de cultura foguèron constituidas gràcias a las contribucions de personas – particulars, escrivan-a-s, artistas, militant-a-s etc. – que lor tenguèt a còr de preservar e metre en partatge aqueste patrimòni cultural dins totas sas expressions. La valor e l’originalitat de las colleccions de la mediatèca interregionala occitana proven en part granda d’aquesta constitucion participativa e populara.
Avètz de documents que ne volètz assegurar la conservacion e la transmission a las generacions futuras ?
Los bibliotecaris, las bibliotecàrias, e los e las archivistas del Pòl Patrimòni e Sabers son a la vòstra disposicion per vos ajudar a avalorar la valor patrimoniala o scientifica dels vòstres documents, vos conselhar e, se s’escai, vos acompanhar dins lo vòstre procediment de transmission a las generacions futuras. Se lor contengut correspond pas a l’airal de las colleccions del CIRDÒC-Institut occitan de cultura, vos orientarem cap als establiments mai indicats per los aculhir.
Se vos volètz pas separar dels vòstres documents, trantalhetz pas a los nos senhalar, vos poirem donar totes los conselhs per n’assegurar las melhoras condicions de conservacion e de salvagarda.
De qué vendràn mos documents ?
En fisar vòstres documents al CIRDÒC-Institut occitan de cultura, asseguratz lor conservacion dins las meteissas condicions que l’ensemble de las colleccions, que garantís l’integritat de lor supòrt fisic.
Vòstres documents seràn l’objècte d’un tractament documentari e seràn integrats a las basas grandas de referenciament documentari nacionalas e internacionalas. Un inventari vos serà provesit e seretz informats de cada etapa del tractament.
Al moment de l’entrada dels vòstres documents, poiretz causir liurament las condicions de comunicacion (liura, sus demanda motivada o encara retardada de qualques annadas), d’espleitacion e de difusion.
Aital, en foncion de vòstra autorizacion, aqueles documents poiràn èsser comunicats als usatgièrs de la mediatèca, numerizats e meses en linha sus Occitanica, o encara, èsser expausats e utilizats per d’òbras de recèrca, creacions artisticas o projèctes pedagogics. Per caduna d’aquelas utilizacions e espleitacions, nos assegurarem que se fagan dins lo respècte plen dels dreches de proprietat intellectuala. Se vòstres documents son l’objècte d’una numerizacion, una còpia ne vos serà remesa.
Lo blòg Obrador vos rend compte de l’actualitat de las colleccions del CIRDÒC-Institut occitan de cultura.
Cossí procedir ?
Se causissètz de nos fisar vòstres documents, 3 modalitats legalas (definidas per l’article L del Còdi del Patrimòni) son a la vòstra disposicion.
Lo DON
Per una procedura de don transferissètz la proprietat dels vòstres documents al CIRDÒC-Institut occitan de cultura. Dintran aital dins las colleccions publicas francesas, venon imprescriptibles, inalienables e insasibles. Lo CIRDÒC-Institut occitan de cultura ven plenament detentor del document e assegura sa conservacion, comunicacion als publics mas tanben valorizacion.
Çaquelà, podètz al moment del don apondre a la procedura de condicions de comunicacion o difusion especificas.
La procedura de don compren pas lo transferiment dels dreches de proprietat intellectuala. Los autors e possessors dels dreches sèrvan lors prerogativas en matèria de proprietat intellectuala. Se lo document es pas tombat dins lo domeni public, lor autorizacion serà demandada per tota accion de difusion o espleitacion del document.
Quinas formalitats complir per donar mos documents ?
La procedura de don se fa en tres etapas :
Lo donator significa per letra simpla son intencion de donar un o mantun documents. En responsa, lo CIRDÒC-Institut occitan de cultura vos significarà son acceptacion de don per letra. Un rendètz-vos serà fixat per la remesa dels documents.
Abans d’enregar aquesta procedura, trantalhetz pas a nos contactar, vos poirem acompanhar e vos portar totes los conselhs necessaris.
Lo DEPAUS
Lo depaus permet de fisar vòstres documents al CIRDÒC-Institut occitan de cultura en tot servar la vòstra proprietat sus aqueles. Vòstres documents seràn conservats dins las meteissas condicions que las colleccions patrimonialas del CIRDÒC-Institut occitan de cultura, sètz liure de pausar de condicions de consultacion e de difusion e de venir recuperar lo document sus simpla demanda.
Quinas formalitats complir per depausar mos documents ?
La procedura de depaus se fa per la redaccion d’una convencion de depaus que fixa l’ensemble de las condicions de conservacion dels documents al dintre de las colleccions del CIRDÒC-Institut occitan de cultura. Las convencions de depaus son redigidas al cas per cas e respèctan l’ensemble de las condicions fixadas pel depausant. Aital, trantalhetz pas a nos contactar abans de nos portar vòstres documents.
Un còp las convencions signadas per las doas parts, un rendètz-vos es fixat per la remesa dels documents.
Lo LEGAT
Lo legat es un don consentit aprèp la mòrt del donator, en conformitat amb sas volontats. Deu èsser fixat per testament e èsser complit pel eretièrs o los executants testamentaris. L’intencion de don deu èsser clarament exprimida dins un testament que siá autentic (establit per un notari), olograf (de la man del testamentari) o encara mistic (depaus secrèt davant notari).
Quinas formalitats complir per legar mos documents ?
Las possibilitats de legats son variadas, trantalhetz pas a nos contactar o a vos raprochar d’un notari per ne saber mai.
Volètz far un procediment de don, depaus o legat ? Vos volètz simplament entresenhar ? Nòstres agents e agentas son a la vòstra disposicion per vos informar.
