En crear lo Centre internacional de documentacion occitana en 1975, l’escrivan Ives Roqueta e los primièrs donators, contributors, cercaires, artistas e militants engatjats dins la construccion d’una « bibliotèca internacionala occitana » realizavan un projècte istoric : dotar la cultura e la societat d’òc d’una institucion culturala enciclopedica, professionala e de vocacion internacionala cargada de recampar per transmetre e far viure dins lo mond contemporanèu la riquesa e la diversitat de las expressions artisticas, scientificas, politicas, socialas occitanas.
Vengut en 1998 lo primièr establiment public entièrament dedicat a la lenga e la cultura occitanas, lo CIRDÒC a pas jamai daissat d’èsser una institucion ciutadana, que sas colleccions tan coma sas accions existisson pas que per la contribucion dels creators, dels cercaires, de las associacions e dels militants de tota mena.
La salvagarda e la transmission a las generacions futuras del patrimòni cultural en lenga occitana es una preocupacion de totes, donators tan coma usatgièrs. Los obradors en matèria de cooperacion internacionala, de recèrca scientifica, de professionalizacion dels actors culturals, d’innovacion tecnologica portats pel CIRDÒC e sos partenaris representan d’enjòcs que concernisson fòrça professionals e actors de la cultura, de l’educacion, del desvolopament local.
Aquò es la rason per la que l’associacion dels Amics del Centre Interregional de Desvolopament de l’Occitan foguèt creada en 2016 a l’entorn d’un collectiu de professionals e de ciutadans utilizators dels servicis del CIRDÒC, amb la tòca de jogar un ròtle actiu alprèp de l’establiment.
L’associacion dels Amics del CIRDÒC es un collectiu ciutadan e independent
Los membres de l’associacion – universitaris, professionals de l’educacion e de la cultura, artistas, escrivans, editors, associacions o simples usatgièrs, franceses e estrangièrs – per lor sosten, mòstran que lo raionament del Centre s’espandís al-delà de las confinhas de l’espaci occitan e exprimisson lor desir de participar a sas accions.
L’associacion dels Amics del CIRDÒC es independenta. En 2016, quand l’avenidor de l’institucion èra mes en question per las decisions d’unas collectivitats, l’associacion intervenguèt alprèp de l’Estat e de las collectivitats territorialas per tal que los actors publics s’engatgèsson a la perennizar e la sosténer a la nautor d’una institucion granda per la cultura, lo saber e l’educacion.
Los aderents vòlon prene part a la vida e a las accions de l’establiment, en particular :
- Enriquir la memòria e lo patrimòni comuns ;
- Contribuir al desvolopament de las coneissenças sus la lenga e la cultura occitanas ;
- Crear e animar una comunautat d’escambis e de partatge entre sos membres ;
- Escambiar d’un biais permanent amb los elegits e los agents del CIRDÒC ;
- Organizar d’eveniments culturals en partenariat amb lo CIRDÒC.
Volètz rejónher los Amics del CIRDÒC ?
Totas las informacions sus http://www.amicsdelcirdoc.com
I trobaretz lo bulletin d’adesion e las actualitats de l’associacion.
O contactatz-nos : amicsdelcirdoc@laposte.net
