Silvan Chabaud convidat del Licèu Philippe Lamour e de l’Ostal-Teatre de las literaturas a nautas voses a Nimes
Date / Heure
Date(s) - 22 Novembre 2018
14:00 - 19:00
Lieu
Maison-Théâtre des littératures à voix hautes à Nimes
Catégories
Lo CIRDÒC, l’Ostal-Teatre de las literaturas a nautas voses e lo Licèu Philippe Lamour de Nimes convidan Silvan Chabaud, musician, cantaire, poèta e doctor en literatura occitana especialista de l’òbra del poèta barròc Loís Bellaud de la Bellaudièra, lo 22 de novembre que ven.
- Conferéncia : Loís Bellaud de la Bellaudièra (1543-1588), poèta barròc occitan
Rendètz-vos lo dijòus 22 de novembre a 14h al Licèu Philippe Lamour a Nimes per una conferéncia sul grand poèta marselhés del sègle XVI per Silvan Chabaud que li consacrèt una tèsi de doctorat en 2007. Conferéncia animada per Guillaume Boppe e organizada pels estudiants en classas preparatòrias a las grandas escòlas. Conferéncia dobèrta al public.
Anfiteatre del Licèu Philippe Lamour, 36 carrièra d’Occitània a Nimes.
- Fantasiá literària 59 : Silvan Chabaud convidat de l’Ostal-Teatre de las literaturas a nautas voses
Aprèp Aurélia Lassaque en 2017, l’Ostal de las literaturas e lo CIRDÒC son uroses de convidar ongan Silvan Chabaud, cofondator del collectiu reggae-hiphop Maurèsca e membre dels Doctors de trobar, especialista de la literatura occitana barròca e escrivan. Publica regularament de poèmas dempuèi la fin de las annadas 1990 dins diferentas revistas literàrias puèi un primièr recuèlh, Leis illas infinidas / Les îles infinies, a las edicions Jorn en 2012, puèi Montar / Monter a las edicions L’Aucèu libre en 2016. A l’imatge d’aqueste darrièr recuèlh, que conta l’ascension d’una montanha, Silvan Chabaud escriu una poesia lumenosa, plena de rocalhas, que contempla lo monde en tot avançar andante e los uèlhs plen cèl.
Rescontre amb l’autor a 19h a l’Ostal-Teatre de las literaturas a nautas voses, 26 carrièra de la Republica, a Nimes.
