“L’ARTzac” – Sortida de residéncia
Date / Heure
Date(s) - 29 Octobre 2021
18:30 - 20:30
Lieu
Mediatèca occitana (CIRDOC-Béziers)
Catégories
« Larzac – 50 ans de mobilizacion »
La mobilizacion a l’entorn del platèu de Larzac foguèt un eveniment iconografic màger qu’a conduit a la produccion d’afichas a las caracteristicas artisticas remirablas.
A l’escasença del cinquantenari de la debuta del movement, lo CIRDÒC – Institut occitan de cultura a desirat propausar a d’artistas – plasticians, de renovar aquel gèste creatiu e de crear d’òbras a l’inspiracion militanta dins la dreita linha dels eslogans emblematics « gardarem la tèrra », « viure e decidir al país », « as dreit a la paraula »… posant notadament son inspiracion dins las colleccions de l’establiment al cors d’una residéncia de creacion d’una setmana.
Projècte L’ARTzac
Jean-Charles Couderc (Dançar sens memòria, la Banena) e Robin Chouleur (Pourtour végétal de Méditerranée) seràn aital presents pendent la seconda quinzena del mes d’octòbre (del 18 al 22/10 pel primièr, setmana del 25 pel segond). Lors realizacions seràn presentadas al public lo divendres 29 d’octòbre, mesas en regard amb d’archius emblematics del movement sul Larzac eissits de las colleccions del CIRDÒC – Institut occitan de cultura.
Jean-Charles Couderc
Nascut a Courbevoie (92), Joan Carles Codèrc es originari de Segala en Avairon. Lo bacalaureat obtengut, s’orienta vèrs las arts aplicadas e passa per l’ENSBA Marsilha, puèi l’ENSAV La Cambre ont practica la tipografia pendent tres ans. Aprèp qualques annadas de grafisme, acaba per s’orientar vèrs lo dessenh, puèi causís de se definir coma plastician.
De sas primièras armas coma grafaire, Joan Carles Codèrc gardarà d’en primièr un amor per la paret. Lo mur coma partida integranta d’un luòc, coma afirmacion d’aquel.
Çò que i a de particularament extraordinari dins lo trabalh d’aquel jove parietalista – coma se definís – es son biais de cartografiar la memòria, sos entrelaces, sas zonas d’ombras e de lum. Coma la metafòra visuala d’una lenga dins la quala tot s’entre-penetra e se religa… coma una cultura en siá.
Robin Chouleur
Nascut a Nimes, Robin Chouleur viu e trabalha en Occitània. Enfant, la proximitat de sa familha amb lo mitan artistic li permés de descobrir las òbras abstraitas dels artistas Claude Viallat e Roger Vilder. Ne conservarà una propension a l’abnegacion dins la repeticion de motius, un engatjament fisic dins l’acte creatiu tan coma una volontat de descompausar los diferents movements que constituisson autant d’etapas dins lo traçat de sos dessenhs. Fa sos estudis a l’Escòla Nacionala Superiora del Paisatge a Versalhas ont s’apassiona per las representacions spacio-temporalas dels territòris. Entamena alara dins sas òbras un procediment teoric de simplificacion esquematic dels luòcs qu’abòrda. I apausa una grilha a malhas quadradas dins la quala cada cellula es un element precís de l’espaci format per l’ensemble, a un temps dona. Uèi, Robin Chouleur explora dins sas òbras las logicas que se desplegan al còr de caduna d’aquelas cellulas elementaras. Amb elas, faiçona de sistèmas interrelacionals coerents en recrutant de règlas constructivas a las declinasons multi-escalaras.
Divendres 29/10 a 18h30 – Mediatèca occitana : Vernissatge oficial
Lo divendres 29 d’octòbre que ven, los dos artistas seràn presents a la Mediatèca occitana per presentar lors realizacions a l’escasença d’un acròcament inedit, que farà dialogar aquelas creacions novèlas amb d’afichas e documents eissits de las annadas de mobilizacion sul Larzac.
INFORMACIONS PRACTICAS
Sortida de residéncia : 29/10 a 18:30 a la Mediatèca occitana
Gratuit sus reservacion alprès del : secretariat@oc-cultura.eu / 04.67.11.85.10.
