Jornadas del patrimòni : Los Mòbles Modèstes d’Alain Fornells
Date / Heure
Date(s) - 14 Setembre 2018 - 15 Setembre 2018
10:00 - 18:00
Lieu
Lo CIRDÒC
Catégories
Les mòbles animats d’Alain Fornells s’expausan al CIRDÒC e son autant d’escasenças d’escotar los contes e anecdòtas contadas per lor creator (en occitan e en francés).
A mièg-camin del mòble e del joguet de fusta, descobrissètz los Mòbles Modèstes pendent una visita contada. Una istòria s’i desplega, acompanhada per de mòbles a tèmas. De mecanismes amagats provòcan de suspresas e acompanhan las paraulas d’Alain Fornells, que conta en occitan o en francés.
Cada Mòble Modèst es dedicat a un personatge, a un eveniment. Es lo malhon d’un conte entre realitat e ficcion, viatge de la memòria, quista del quotidian meravilhós. Vos convidan dins un pais qu’existís pas. I trobaretz benlèu vòstres sòmis ?
Dissabte 15 de 11h a 12h e de 17h a 18h : Espectacle contat (en occitan e en francés) a l’entorn de l’exposicion “Los Mòbles Modèstes” d’Alain Fornells.
Ebenista poèta, Alain Fornells de Baçan vos aculhís e vos farà descobrir pendent una visita contada sos “Mòbles Modèstes”. Seretz encantat per aquel viatge improbable ont aqueles objèctes de res van prendre vida jos vòstres uèlhs.
Las plancas recuperadas, los baüts garrèls, los armaris, les comòdas, lo cruissiment d’una pòrta, vos van faire cabussar dins vòstra pichòta enfància, un univèrs poetic se dubrirà a vos.
