“Je ne vois plus la laine brûler” – Sortida de residéncia a l’entorn del filme cort
Date / Heure
Date(s) - 3 Març 2023
18:30 - 20:00
Lieu
Mediatèca occitana (CIRDOC-Béziers)
Catégories
PRESENTACION
« Un matin, Marie Garmath, pastra d’un vilatjòt de Cevenas, se desrevelha destrassonada dins una cambra d’ostalariá de Dubai. Enrodada per sas fedas, nos conta cossí son tropèl es arrivat aquí.
Es l’istòria d’una pastra que cada annada, gèta de tonèls de lana e que l’avenidor deven cada jorn mai incertan ; es l’istòria d’una pastra que pasmens, contunha de creire en son mestièr e se demanda de còps s’abita encara lo meteis monde que los autres.
Es l’istòria d’una mecènas d’art contemporanèu, un pauc perduda entre lo desvolopament de son entrepresa e sa vida solituda, que torna al vilatge de son paire per tornar donar un sens a sa vida. Es l’istòria d’un vilatjòt de Cevenas, tiralhat entre sa vida rurala e un avenir internacional. Es l’istòria de doas femnas, qu’a priori tot opausa, que tròban un lengatge comun per abitar la meteissa tèrra.
Es enfin l’istòria d’una mecènas que crompa tonèls de lana locala per ne faire de vestits de nauta cotura e es l’istòria d’una pastra que vend tonèls de lana per salvagardar la beutat e lo mistèri de son monde. »
La Mediatèca occitana vos propausa de descobrir aquel novèl projècte de filme cort e las joves plumas investidas dins sa realizacion : Estela Blénet e Fracesco Canova. Nascuts dins las annadas 1990, fotografes totes dos e joves cineastas, s’interèssan als eritatges culturals e socials e a la transmission orala.
Vos desvelaràn las primièras linhas de lo lor trabalh entre documentari e ficcion, interrogant e confrontant dos mondes qu’a priori, tot separa, per mièlhs comprene cossí se poirián penetrar e engendrar procèssus vertuoses, notadament lo de salvagarda d’un territòri e de sas particularitats.
Aquel projècte de creacion audiovisuala es nascut suls platèus de las Cevenas, del rencontre d’Estela Blénet e Francesco Canova amb los actors d’un monde pastoral entre crisis e espèrs de renovelament. Posant lor inspiracion dins la literatura internacionala (Steinbeck, Faulkner, Cesare Pavese…) e lo cinèma (Terence Malick, Raymond Depardon, Pietro Marcello), los dos artistas abordaràn amb umor las contradiccions d’aqueles dos univèrs a las vidas parallèlas.
Lecturas, escambis e cortas projeccions dels precedents trabalhs dels dos autors, constituiràn la trama d’aquela rica serada.
INFORMACIONS PRACTICAS
Lo divendres 03/03 a 18h30. Mediatèca occitana – 1 bis Bvd Du Guesclin, 34500 Béziers.
Infos e reservacion (conselhada) : secretariat@oc-cultura.eu / 04 67 11 85 10
