Espectacle “Oblique Cycle 2 – Trouble Langage”
Date / Heure
Date(s) - 17 Octobre 2021
18:00 - 19:15
Lieu
Théâtre Saint-Louis
Catégories
Vincent Trollet, compositor, e Vahram Zaryan, performer (mime contemporanèu) e empontaire, que cèrcan amassas despuish quauques annadas, a desvolopar un genre ibride e pluridisciplinari, lo teatre musicau. Qu’intègran a la musica de creacion e au tèxte, lo navèth circ, lo mime contemporanèu, la performància dens lo lor espectacle entà’n har sortir ua inventivitat scenica e musicau. Tà l’espectacle Oblique cycle 2 – Trouble Langage, qu’ei au torn deu concèpte de çò d’oblic qui ua recèrca estó miada per Vincent Trollet, Vahram Zaryan, a partir d’òbras deu poèta Frédéric Parcheminier.
Dens Oblique cycle 2-Trouble-Langage, mei d’un laboratòri de recèrca que s’ei hèit e aqueths qu’an permetut de miar ua exploracion scenica e musicau a l’entorn d’aqueths poèmas. Per aquera confrontacion de las arts, lo sens deus mots que’s desplaça en jogar sus la resonància corporau e musicau.
La finalitat d’aqueths tribalhs qu’estó d’explorar la juntada e los sens possibles que çò d’oblic pòt aver tà diferentas fòrmas artisticas.
Un aute aspècte important d’aquera exploracion qu’estó l’integracion de la lenga occitana. Situacions scenicas que vaden vivas tà la lenga e cultura nosta, ligadas au territòri deu Bearn. Los interprèts, que sia comedians o musicians, que dessenhan capvath las lors preséncias sus l’empont, de vertadèrs tablèus visuaus. L’espectator que viu ua experiénça intima qui bremba moments e tròç d’ua memòria collectiva, la d’emponts quotidians, com per exemple repaishs de familha on las cantas occitanas avèvan bèth temps a, o an enqüèra uei, la vertut d’amassar e har vàder mei pròchas las generacions.
Dens lo procèssus de creacion, lo compositor Vincent Trollet qu’a adobat cantas occitanas. Ua residéncia au site de l’Etnopòle (Vilhèra) que l’a permetut de miar ua recèrca documentària suu patrimòni musicau e literari occitan, e qu’a permetut aus autes cantaires de’s sensibilizar a la prononciacion deu bearnés cantat. Lo collectatge de las cantas e la lor integracion dens l’espectacle que s’ei hèita mercés aus conselhs de mei d’un intervienent deu CIRDÒC – Institut occitan de Cultura.
