Date / Heure
Date(s) - 19 Julh 2018 - 21 Julh 2018
Toute la journée

Lieu
Rodez

Catégories

• Fòra lo CIRDÒC

Del 19 de julhet al 21 de julhet de 2018, retrobatz lo CIRDÒC a l’Estivada de Rodés

Lo CIRDÒC es partenari de l’Estivada de Rodés, plaçada ongan jol signe dels trobadors.
Retrobatz lo CIRDÒC pendent tota la durada del festenal amb son novèl « Centre de primièrs secorses occitans » e dins l’encastre de la programacion culturala e literària

Espectacles : Descobrissètz las darrièras creacions a l’entorn del patrimòni artistic e literari occitan. Auditorium dels Archius departamentals.

Dijòus 19/07 – 16 h-17 h 30 / Archius departamentals : Katy Bernard e Monique Burg – « Retraches d’Alienòr d’Aquitània »
Conferéncia teatralizada Katy Bernard, mèstra de conferéncias d’occitan (Universitat Bordeaux-Montaigne), autora de Les Mots d’Aliénor, Aliénor d’Aquitaine et son siècle (Ed. Confluences, 2015), e Monique Burg, comediana e contaira, evocaràn la vida e lo ròtle d’Alienòr. Descobrissètz la duquessa d’Aquitània, que foguèt reina de França puèi reina d’Anglatèrra per lo prisme dels escriches sieus e mercés als tèxtes dels grands autors que gravitèron a son entorn.

Divendres 20/07 – 16 h-17 h 30 / Archius departamentals : Félix Jousserand – « La Canso »- Espectacle de poesia en musica
Artista regonegut de la scèna eslam… Félix Jousserand, ajudat de la dramaturga Caroline Masini, relevèt lo desfís de propausar una relectura contemporanèa del tèxte emblematic de La Canso. Acompanhat a la bassa e a la batariá pels musicians Christophe Lavergne e Gilles Coronado, Félix Jousserand liura un espectacle de poesia en musica, una interpretacion renovelada per l’art de l’eslam e una dobla traduccion inedita (en francés e en occitan contemporanèu) que soslinha tota la modernitat de l’intemporala Cansó.

Dissabte 21/07 – 16 h-17 h 30 / Archius departamentals : Jan dau Melhau
Resisténcia a l’aire del temps En son temps, Jan dau Melhau foguèt objectaire de consciéncia. Resistent, l’es a tot poder, mai que mai lo de la maquina. Es del temps de l’otís, del païsan, de l’obrador, del saber-far e del saber-viure. Es d’aquò que rendrà compte de per qualques uns de sos tèxtes, en occitan e en francés.

Aperitius literaris : Rencontres a l’entorn de l’actualitat de l’edicion occitana, espaci editor

Divendres 20/07 – 18h00-19h00 – Espaci editors : Aperitiu literari : Omenatge als grands òmes
Rendètz-vos encara ongan sus l’espaci editor, per una ora d’escambi e de rencontre amb los autors e los editors que donan a la literatura occitana totas sas letras de noblesa. Lo CIRDÒC faguèt la causida de s’interessar per aquesta edicion 2018 de l’Estivada, sus los tèxtes de qualques autors subreimportants de la literatura d’òc contemporanèa, que una part d’entre eles nos a malurosament quitat dins los darrièrs meses, en fin de lor rendre omenatge.
Amb :
– Lise Gros, a l’entorn de Jòrgi Gròs
– Jean-Claude Dugros, a l’entorn de Bernard Lesfargues
– Philippe Gardy (autor de L’arbre et la spirale, Robert Lafont, polygraphe) et Jòrdi Blanc (Ed.Vent Terral), a l’entorn de Robert Lafont

Dissabte 21/07 – 18h00-19h00 – Espaci editors : Aperitiu literari : Actualitat de l’edicion joinessa occitana
Venètz descobrir qualques unas de las darrièras parucions joinessa de la literatura occitana. D’obratges de fulhetar en familha, que siá per los mai pichons coma per los mai grands, tant lor qualitat estetica e narrativa ne fan de passarèlas de primièr plan vèrs la lenga e la cultura occitanas.
Amb : – Sergi Mauhourat, traductor de “Tres aventuras deu Roman de Renart (GA)” d’Hélène Biu (Ed. Cap’Òc) – Fèliç Daval, autour de “La Garrigueta e lo Nogat “ (Ed. Edite-moi !) – Catherine Lhietoudt per la presentacion de la maleta pedagogica edidata per IEO Edicions.

Divendres 19/07 – Concèrt – 20:15 / Grande Scène : Francis Cabrel, Claude Sicre et leurs invités enchantent les Troubadours

A l’escasença del concèrt una creacion vidèo de Claude Sicre e Amic Bedel (Piget prod) es estada realizada en partenariat amb lo CIRDÒC e l’Ina (Institut nacional de l’audiovisual) per illustrar l’art de la tençó (ajusta poetica) reinterpretat al biais dels trobadors.

Exposicion : Fabuloses trobadors – Los trobadors occitans referéncias de la creacion e de la pensada mondiala contemporanèa

Los trobadors occitans dobriguèron a l’Edat Mejana una revolucion estetica e ideologica qu’acabèt pas de noirir, dins lo monde entièr, la pensada e la creacion contemporanèas. De la pintura de Soulages a la poesia d’Ezra Pound, Dylan o Bashung… en passant per las ajustas musicalas dels Fabulous Troubadours tolosencs ; aquesta exposicion vos propausa un caminament dins las geografias e los flusses de l’art del trobar, del sègle XII a uèi.

Inauguracion de l’exposicion lo divendres 20 a 16h als Archius departementals d’Avairon.

La programacion complèta del festenal : aquí (en francés)