CIRDÒC – Institut occitan de cultura : Missions e mestièrs

Creat en 2019, lo CIRDÒC – Institut occitan de cultura recampa, a l’entorn d’un projècte scientific, cultural, educatiu e social novèl en favor del desvolopament de la lenga e de la cultura occitanas, las missions e mestièrs de dos ancians organismes, lo Centre interregional de desvolopament de l’occitan e l’Institut occitan d’Aquitània.

Las missions estatutàrias de l’establiment

Lo CIRDÒC – Institut occitan de cultura es l’organisme public de vocacion nacionala e internacionala cargat de la salvagarda, de la coneissença e de la promocion de la cultura occitana.
A per mission notadament :

• de recampar, produsir, difusar las ressorsas e los sabers del domeni occitan dins una amira enciclopedica, de contribuir al desvolopament de las coneissenças e a lor difusion al nivèl nacional e internacional ;
• d’obrar a la conservacion del patrimòni artistic, scientific e documentari en lenga occitana, en particular per la gestion e lo desvolopament d’una colleccion publica de referéncia nacionala e internacionala dins son domeni per crompa, recepcion de dons, legats e depauses dins l’encastre d’una politica d’aquisicion definida dins son projècte d’establiment ;
• de contribuir al debat d’idèas, al dialòg intercultural e a l’accès de totes als sabers e a la creacion artistica per d’accions de programacion evenimenciala e una ofèrta de servicis e de practicas culturalas dins e fòra de sos locals ;
• de participar al desvolopament e a la promocion del territòri per d’accions culturalas, toristicas, d’innovacion e de desvolopament de la recèrca ;
• d’obrar a la preservacion e a la transmission del patrimòni literari, artistic, e del patrimòni etnologic e immaterial de l’espaci occitan ;
• de contribuir a la preservacion e a la promocion de la diversitat de las expressions culturalas occitanas dins una amira de promocion del dialòg intercultural e de desvolopament de la cooperacion internacionala en matièra de cultura.

Lo CIRDÒC – Institut occitan de cultura es tanben destinat a animar la cooperacion entre las collectivitats territorialas, lors gropaments e l’Estat qu’exercisson una competéncia partejada en matièra culturala e en matièra de promocion de las lengas de França. Es en particular una de las aisinas de la cooperacion interregionala, anciana e estructurada entre mantuna regions de l’espaci occitan en França e en Euròpa.
Las colleccions, servicis e mejans de l’establiment son espandits sus diferents sites e pòles de competéncias, en gestion dirècta o dins l’encastre d’una politica de cooperacion amb d’organismes associats.

Foncions e Mestièrs

Las accions del CIRDÒC – Institut occitan de Cultura s’articulan entre los dos pòles grands de competéncias e mestièrs eretats dels establiments que ne’n recupèra las missions (Centre internacional de documentacion occitana puèi Centre interregional de desvolopament de l’occitan de 1975 a 2017 e Institut occitan Aquitània de 1996 a 2017), a saber :

• un centre de ressorsas enciclopedic de referéncia nacionala e internacionala qu’assegura un servici public d’informacion e de documentacion en tot contunhar sa mission de conservatòri de las expressions culturalas, scientificas, politicas e socialas occitanas ;
• una aisina de cooperacion, d’engenheria de projècte e d’articulacion de las politicas publicas per las collectivitats aderentas e d’acompanhament dels actors institucionals, professionals e associatius qu’òbran pel desvolopament de las practicas e expressions occitanas alprèp de la societat actuala.

Pòles de competéncias

Direccion / Administracion e Avaloracion

• executa la comanda politica (Conselh d’administracion), assegura l’estudi prospectiu e conselha lo Conselh d’administracion e las collectivitats de tutèla ;
• gerís las ressorsas e los mejans, elabòra e met en òbra las aisinas e accions qu’an per objectiu l’amelioracion de l’accion publica e lo desvolopament de la qualitat del servici rendut en foncion dels besonhs e dels publics-ciblas ;
• elabòra e met en òbra l’estrategia de l’establiment en matièra de desvolopament de l’audiéncia e de l’impacte (cultural, social, economic) de sas accions e servicis ;
• avalora e mena l’adaptacion de l’ofèrta a las evolucions globalas de la societat (usatges e besonhs) e dels territòris per desservir (local, nacional, internacional).

Patrimòni & Sabers

• assegura l’aquisicion, la produccion e la gestion de las ressorsas d’informacion, de las òbras e dels sabers dins una amira enciclopedica e representativa de la riquesa e de la diversitat de la cultura occitana ;
• assegura un servici d’informacion de referéncia, de documentacion e de conselh scientific e cultural adaptat als besonhs e demandas dels diferents publics ;
• elabòra e met en òbra d’accions e projèctes de valorizacion dins l’encastre d’una politica de partenariats culturals, educatius, scientifics, etc.

Publics & Cooperacion / Desvolopament dels publics e de la cooperacion

• elabòra e met en òbra d’accions e servicis amb l’objectiu de satisfar e de desvolopar de publics utilizaires de las ressorsas e competéncias de l’establiment ;
• desvolopa l’audiéncia e l’impacte de las accions e servicis produsits per l’establiment en elaborar e metre en òbra una politica de partenariat qu’a per objectiu d’articular l’ofèrta de l’establiment del local a l’internacional ;
• assegura l’adaptacion de l’ofèrta de l’establiment als diferents tipes de publics e d’usatges.

Innovacion & Otisses de difusion

• administra, manten e desvolopa los equipaments e las aisinas d’archivatge, de gestion e de difusion de las donadas ;
• elabòra e met en òbra l’estrategia informatica de l’establiment ;
• adapta las aisinas e servicis de l’establiment als usatges novèls, en particular numerics.

Ne saber +

Telecargar brocadura institucionala del CIRDÒC – Institut occitan de cultura

Telecargar lo projècte scientific, cultural, educatiu e social
Telecargar lo programa d’activitat de 2020